Fransa yığmasının baş məşqçisi Didye Deşam “Real”ın fransalı ulduz hücumçu Kilian Mbappeni “üçrənglilər”in heyətinə qaytardığını bəyan edib.
Arena.az nüfuzlu italyan jurnalist-insayder Fabritsio Romanoya istinadən məlumat verir ki, fransız mütəxəssis “xoruzlar”ın kapitanının komandanın düşərgəsinə cəlb edildiyini təsdiqləyib:
“Bəli, o, komandanın bir hissəsi olacaq”, deyə baş məşqçi bildirib.
Mart ayında Fransa yığması UEFA Millətlər Liqasının 1/4 final oyunları çərçivəsində Xorvatiya yığması ilə qarşılaşacaq. Bu oyunlar martın 20-i və 23-də baş tutacaq.
Xatırladaq ki, Deşam Mbappeni ötən ilin oktyabr və noyabr toplanışlarında Fransa yığmasının heyətinə cəlb etməmişdi. Fransız mütəxəssis bu qərarını fransalı ulduzun yenicə keçdiyi “Real”da uyğunlaşma mərhələsi mənzərəsində qeyri-kafi idman formasında olması ilə əsaslandırmışdı. Göründüyü kimi, özünü təsdiqləmiş Mbappe üçün Fransa yığmasının qapıları yenidən taybatay açılıb.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Kilian PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 36 oyuna çıxıb, 24 qol vurub, 4 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) və FIFA Qitələrarası Kubokun (2024) qalibi olub.
“Transfermarkt” internet-portalı 26 yaşlı fransalı hücumçunun transfer dəyərini 160 milyon avro məbləğində qiymətləndirir.
