ABŞ prezidenti Donald Tramp Ukrayna müharibəsinə son qoymaq üçün gözlənilən sülh danışıqlarında Ukraynanın da iştirak edəcəyini açıqlayıb və müharibənin indi bitməli olduğunu bildirib.
Tramp həmçinin ABŞ-ın müdafiə naziri Pit Heqsetin Ukraynanın NATO-ya üzvlüyü ilə bağlı fikirlərini düzgün hesab etdiyini bildirib. Heqset bəyan edib ki, Ukrayna NATO-ya üzv olmamalıdır.
Tramp isə müdafiə xərcləri ilə bağlı Rusiya və Çinlə konfrans keçirmək istədiyini ifadə edərək, nüvə silahına ehtiyac olmadığını vurğulayıb. Tramp müdafiə xərclərinin azaldılması ilə bağlı Çin və Rusiya ilə danışmaq istədiyini vurğulayıb.
Tramp bildirib ki, 2014-cü ildə Krımı işğal etdikdən sonra Böyük səkkizlikdən (G8) çıxarılan Rusiya yenidən birliyə daxil olmalıdır. “Rusiyanın geri qayıtmasını görməyə şad olardım. Düşünürəm ki, Putin də bunu görməkdən şad olardı. Obama və bəzi başqaları onları kənarlaşdırmaqla səhv etdilər. Onlar da masa arxasında olmalıdırlar”, – Tramp deyib.
***
Tramp elektron cihazların istehsalında strateji əhəmiyyət kəsb edən çiplərə də toxunub. Tayvanın çip istehsalını ABŞ-dan çıxarıldığını ifadə edən Tramp, bu sənayeni yenidən ABŞ-a gətirmək istədiklərini bildirib.
Donald Tramp ölkələrə qarşılıqlılıq əsasında tariflər tətbiq etmək planını əks etdirən sərəncam imzalayıb.
Tramp bu bəyanatı ABŞ ticarət əlaqələrində qarşılıqlı olmayan razılaşmalarla mübarizə üçün hərtərəfli planın işlənib hazırlanmasına yönəlmiş sərəncam imzaladıqdan sonra verib.
Ticarətdə ədaləti təmin etmək üçün qarşılıqlı tariflər tətbiq etmək qərarına gəldiyini ifadə edən Tramp, “hansı ölkə ABŞ-a nə tətbiq edirsə, biz də eyni cür davranacağıq”, – deyib.
Tramp ƏDV sistemindən istifadə edən ölkələrə müraciət edəcəklərini bildirib və bu sistemin tarifdən çox daha “cəzalandırıcı” olduğunu iddia edib: “ƏDV-yə tarif kimi baxılacaq”.
Ölkələr tərəfindən verilən subsidiyalara da baxılacağını ifadə edən Tramp, qeyri-pul tarifləri üçün də tənzimləmələr ediləcəyini bildirib.
