Avstraliya federal hökuməti əcnəbi vətəndaşların ölkədə mənzil almasına qadağa qoymağa hazırlaşır. Bu barədə baş xəzinədar Cim Çalmers məlumat verib.
"Hökumət ən azı iki il ərzində xarici investorların tikintisi başa çatmış yaşayış binalarını almasına qadağa qoyacaq və həmçinin xaricilər tərəfindən torpaqların satın alınması ilə bağlı bank əməliyyatlarına ciddi nəzarət tətbiq edəcək. Bu, milli mənzil bazarında qiymətləri aşağı salmaq üçün edilir", - Çalmersin bəyanatında deyilir.
Xəzinədar həmçinin bildirib ki, əcnəbilərin hər hansı mənzil almasına tam qadağa 2025-ci il aprelin 1-dən 2027-ci il martın 31-dək qüvvədə olacaq. Gözlənilir ki, bu müddət ərzində ölkə hakimiyyəti gələcəkdə onun qüvvədə olma müddətini uzadıb-uzatmayacağını müəyyən edə biləcək: "Bu, avstraliyalılara xaricilər tərəfindən satın alınacaq evləri almağa imkan verəcək".
Yeni qadağanı tətbiq etmək üçün Avstraliya Vergilər İdarəsi və Xəzinədarlığı əlavə audit səlahiyyətləri və 16,5 milyon Avstraliya dolları (10,5 milyon ABŞ dolları) maliyyə alacaq.
Əziz Mustafa, Oxuməni.az
