Rusiya və ABŞ prezidentləri Vladimir Putin və Donald Trampın görüşü substantiv olmalı və Ukrayna münaqişəsi üzrə danışıqlarda irəliləyişdən asılıdır...
Poliqon xəbər verir ki, bunu ABŞ dövlət katibi Marko Rubio bildirib. Dövlət katibi jurnalist Ketrin Herriclə X səhifəsində dərc olunmuş müsahibəsində bildirib ki, iki ölkə arasında potensial əməkdaşlıq sahələrinə baxmayaraq, Ukrayna böhranı münasibətləri çətinləşdirən əsas amil olaraq qalır.
“Bunun nə vaxt baş tutacağını bilmirəm, amma prezident Putin və prezident Tramp arasında görüş baş tutmalıdır. Bu görüş əsaslı olmalıdır. Biz bilməliyik ki, bu görüş nələri əhatə edəcək və nəyə nail olunacaq”, deyə Rubio qeyd edib.
Dövlət katibi həmçinin ABŞ-nin keçmiş prezidenti Co Baydenin administrasiyası dövründə Moskva ilə Vaşinqton arasında əlaqələrin itirilməsindən narahatlığını bildirib. Onun sözlərinə görə, hətta “Soyuq Müharibə” illərində SSRİ ilə ABŞ arasında hazırda demək olar ki, işlək olmayan rabitə kanalları saxlanılırdı.
Rusiya və ABŞ nümayəndə heyətləri arasında aparılan son danışıqları şərh edərkən, Rubio qeyd edib ki, görüşdə ərazi məsələləri müzakirə edilməyib:
“Görüşün məqsədi sülh müzakirəsində real marağın olub-olmadığını müəyyən etmək olub”, deyə dövlət katibi əlavə edib.
Rusiya prezidentinin mətbuat katibi Dmitri Peskov bildirib ki, Vladimir Putinlə Donald Trampın görüşünə hazırlaşmağın nə qədər vaxt aparacağını indi proqnozlaşdırmaq mümkün deyil. O qeyd edib ki, iki ölkə prezidentlərinin artıq bir-biri ilə görüşmək istəyini ifadə etdiklərini nəzərə alsaq, vaxt çərçivəsi haqqında danışmaq mümkün deyil.
Poliqon.info
