Uarren Baffet şənbə günü "Berkshire Hathaway" şirkətinin səhmdarlarına ünvanladığı illik məktubunda ABŞ hökumətinə bir mesaj göndərib.
Valyuta.Az xəbər verir ki, o, Vaşinqtonu sabit valyutanı qorumağa və "həyatda ən çətin vəziyyətdə olanlara" diqqət yetirməyə çağırıb.
"Əgər maliyyə intizamsızlığı hökm sürərsə, kağız pulun dəyəri tamamilə yox ola bilər," – deyə Baffet yazıb. "Bəzi ölkələrdə bu məsuliyyətsiz təcrübə adi hala çevrilib və ABŞ də qısa tarixində bir neçə dəfə bu təhlükəyə çox yaxın olub."
Dünyanın ən məşhur investoru hesab edilən, 94 yaşlı Baffet məktubunda yaşı ilə bağlı da danışıb. O, artıq əsaya ehtiyac duyduğunu və may ayında keçiriləcək "Berkshire"ın illik toplantısında səhmdarların suallarına əvvəlkindən daha az vaxt ayıracağını bildirib.
Bununla belə, Baffet səhmdarları əmin edib ki, şirkət rəhbərliyi vitse-sədr Qreq Abelə ötürüldükdən sonra da etibarlı əllərdə qalacaq. O, Abelin kapitalın idarə olunması bacarığını "aydın şəkildə nümayiş etdirdiyini" vurğulayıb.
Baffetin məktubu ilə yanaşı, "Berkshire"ın illik hesabatı da yayımlanıb. Şirkət üçüncü dəfə ardıcıl olaraq illik əməliyyat mənfəətində rekord göstəriciyə nail olub və bu rəqəm 27% artaraq 47,44 milyard dollara çatıb.
2024-cü ilin sonunda şirkət rekord səviyyədə – 334,2 milyard dollar nağd vəsait və ekvivalentlər ilə ili başa vurub. Bu, yüksək qiymətləndirmələr və aqressiv səhm satışları, xüsusilə də "Apple" səhmlərinin satışı ilə bağlıdır. "Berkshire" doqquz rübdür ki, xalis səhm satıcısı mövqeyindədir.
ABŞ-nin maliyyə vəziyyəti ilə bağlı narahatlığına baxmayaraq, Baffet bildirib ki, şirkəti hələ də nağd vəsaitdən daha çox səhmlərə, xüsusən də ABŞ səhmlərinə üstünlük verməyə davam edəcək. O, "Berkshire"ın hələ işini bitirmədiyini qeyd edib.
Baffet, həmçinin "Berkshire"ın Yaponiyanın beş ticarət şirkətindəki paylarını artıracağını bildirib. Bunlar "Itochu", "Marubeni", "Mitsubishi", "Mitsui" və "Sumitomo" şirkətləridir. Şirkət bu investisiyalar üçün 2024-cü ilin sonuna qədər 23,5 milyard dollar ayırıb.
Son illərdə səhmlərin dəyərinin sürətlə artması fonunda sərfəli investisiya imkanlarının azalmasından şikayətlənən Baffet, "Standard & Poor’s 500" indeksinin bu həftə yeni rekorda çatdığını, "Nasdaq" indeksinin isə dekabrın 16-da qeydə alınan pik səviyyəsindən cəmi 3% geri qaldığını vurğulayıb.
Son bir ildə "Berkshire"ın səhmləri 15% artıb, halbuki "S&P 500" indeksi 18% yüksəlib. Son on ildə isə "Berkshire"ın səhmləri 225%, "S&P 500" isə dividendlər nəzərə alınmaqla 241%, dividendlərsiz isə 185% artım göstərib.
Baffet mayın 3-də Omaha, Nebraska ştatında keçiriləcək "Berkshire"ın illik toplantısında şirkətin gələcək perspektivləri ilə bağlı daha ətraflı məlumat verəcəyini gözlədiyini bildirib.
Adətən on minlərlə insanın qatıldığı bu toplantı bu il daha qısa olacaq və ənənəvi film nümayişi baş tutmayacaq.
Baffet məktubunda yaşı ilə bağlı zarafat da edib. O, hər bazar günü 91 yaşlı bacısı Berti ilə köhnə tipli telefon vasitəsilə danışdığını qeyd edib.
"Biz qocalığın gətirdiyi sevinclərdən danışır və əsalarımızın hansı daha yaxşıdır kimi həyəcanverici mövzuları müzakirə edirik," – deyə o bildirib. "Mənim üçün isə əsasın əsas faydası – üzüstə yıxılmamağa kömək etməsidir."
Rəhim
