İspan hücumçu Alvaro Morata mövsümün ortasında icarə əsasında “Milan”dan Qalatasaray”a keçidini əsaslandırıb.
Arena.az “Marca” nəşrinə istinadən, ispan futbolçunun bu barədə fikrini təqdim edir:
“Əvvəlcədən, mən “Milan”da əsasən Paulo Fonsekanın rəhbərliyi altında oynamağa can atırdım. Onun qovulması ilə hər şey öz əhəmiyyətini itirdi. Daha mən özümü klubda rahat hiss etmirdim”, deyə Morata etiraf edib.
Xatırladaq ki, Morata “Qalatasaray”la müddəti 2026-cı ilin yanvar ayının 20-nə qədər qüvvədə olacaq icarə müqaviləsi imzalayıb. Türkiyə nəhəngi bu keçidə 6 milyon avro məbləğində xərc çəkib. Müqavilə 2026-cı ilin sonuna qədər müddətə uzadılması və həmçinin futbolçunun müvafiq istək əsasında satın alınması şərtlərini ehtiva edir.
Xatırladaq ki, Morata 2024-cü ilin iyul ayında Madrid “Atletiko”sundan ayrılaraq “Milan”a keçib. Moratanın “rossoneri”nin düşərgəsinə keçidi “Milan”a 13 milyon avro məbləğində başa gəlib. İspan futbolçu “Milan”la müddəti 2028-ci ilin iyun ayının sonuna qədər qüvvədə olacaq müqaviləyə imza atıb.
Cari mövsümdə Morata “Milan”ın heyətində bütün yarışlarda 25 oyuna çıxıb, 6 qol vurub və 2 məhsuldar ötürmə verib.
“Qalatasaray” üçün isə Morata 4 oyun keçirib və 2 qolla fərqlənib.
Morata Madrid “Atletiko”sunun yetirməsidir. Təcrübəli hücumçu karyerası ərzində “Xetafe”, “Real”, “Yuventus” və “Çelsi”də də çıxış edib.
Alvaro Morata hazırda kapitanı olduğu, 2014-cü ilin martında debüt etdiyi İspaniya yığmasının heyətində 84 oyuna 37 qol və 8 məhsuldar ötürmə ilə fərqlənib. Morata ötən il İspaniya yığması ilə Almaniyada keçirilmiş Avropa çempionatının (AÇ-2024) qalibi olub.
“Transfermarkt” internet-portalı 32 yaşlı ispan hücumçunun transfer dəyərini 13 milyon avro məbləğində qiymətləndirir.
