Martın 2-də baş tutan NBA-nın müntəzəm çempionat oyununda "Los-Anceles Leykers" in ulduz hücumçusu LeBron Ceyms, "Los-Anceles Klippers"ə qarşı keçirilən matçda 17 xal toplayaraq komandasının 108:102 hesablı qələbəsində böyük pay sahibi olub.
Offsideplus.az xəbər verir ki, bu, onun karyerasındakı 1000-ci qələbəsi olub.
Bu nəticə ilə Ceyms ümumi karyerası ərzində – həm müntəzəm mövsüm, həm də pley-off oyunlarını nəzərə alaraq – 49 999 xal toplayıb. Beləliklə, o, 50 000 xal sərhədinə çatmaq üçün cəmi 1 xal uzaqlıqda dayanıb.
Hazırda 40 yaş 62 günlük olan LeBron Ceyms NBA-nın ən yaşlı aktiv oyunçusudur. O, martın 5-də "Leykers"in ev oyununda "Nyu-Orlean Pelikans"a qarşı keçiriləcək qarşılaşmada bu tarixi nailiyyəti rəsmiləşdirə bilər.
Əgər LeBron Ceyms 50 000 xal səddini keçərsə, bu, NBA tarixində misilsiz bir rekord olacaq. Hazırda heç bir oyunçu karyerası ərzində (müntəzəm mövsüm + pley-off) bu qədər xal toplamayıb.
LeBron artıq NBA tarixində ən çox xal toplamış oyunçudur, çünki o, keçən il Kərim Əbdül-Cəbbərin 38 387 xallıq müntəzəm mövsüm rekordunu qırıb. 50 000 xal sərhədini keçmək isə onu daha da əfsanəvi bir səviyyəyə çıxaracaq.
Əgər o, martın 5-də bu rekordu rəsmiləşdirsə, NBA tarixinə düşən ilk və yeganə oyunçu olacaq.
