İtaliyanın "Prada" brendi, ABŞ-nin "Capri Holdings" investisiya şirkətindən "Versace" moda evini almaq üçün danışıqlar aparır.
Valyuta.Az xəbər verir ki, bu müqavilənin dəyəri təxminən 1,5 milyard avroya (1,2 milyard funt-sterlinq) çata bilər.
"Bloomberg" agentliyinin məlumatına görə, Milanda yerləşən "Prada" və Nyu-York birjasında qeydiyyatdan keçmiş "Capri" bu ay ərzində razılığa gələ bilər. Lakin danışıqların nəticəsiz qalma ehtimalı da mövcuddur.
Əgər müqavilə baş tutarsa, "Versace" yenidən İtaliya mülkiyyətinə qayıdacaq və bu, "Prada"nın bazardakı mövqeyini gücləndirəcək. Beləliklə, şirkət "Louis Vuitton", "Moët & Chandon" və "Hennessy" kimi lüks markalara sahib olan Fransanın "LVMH" konserni ilə daha effektiv rəqabət aparmağa çalışacaq.
"Prada" brendi 1913-cü ildə Mario Prada tərəfindən Milanda təsis edilib. 1970-ci illərdən etibarən isə şirkət onun nəvəsi Miuccia Prada tərəfindən idarə olunur.
"Capri Holdings" isə əvvəllər "Michael Kors" adı ilə tanınırdı. Şirkət 2017-ci ildə ayaqqabı brendi "Jimmy Choo"nu, 2018-ci ildə isə "Versace"ni satın aldıqdan sonra adını dəyişib.
Əgər "Versace" 1,5 milyard avroya satılarsa, bu, "Capri" üçün maliyyə itkisi demək olacaq. Çünki "Michael Kors" 2018-ci ildə "Versace"ni 2,1 milyard dollara almışdı. Son illərdə isə İtaliya brendi çətinliklərlə üzləşib.
"Versace"nin gəlirləri azalır
Bu ay "Capri" şirkəti 2024-cü ilin son üç ayında "Versace"nin gəlirlərinin 193 milyon dollar olduğunu açıqlayıb ki, bu da ötən ilin eyni dövrü ilə müqayisədə 15% azalma deməkdir. Moda evinin cari maliyyə ilində zərərlə işləyəcəyi gözlənilir, lakin gələn ildən etibarən xərcləri qarşılamaq səviyyəsinə çatması planlaşdırılır.
"Versace"nin portfelində "Louis Vuitton" kimi çətin dövrlərdə belə sabit satış gətirən baqaj məhsulları yoxdur. Bundan əlavə, markanın dizayneri Donatella Versacenin rəhbərlikdə qalacağı da sual altındadır. O, qardaşı Canni Versace 1997-ci ildə qətlə yetirildikdən sonra şirkətə rəhbərlik edir.
Milanda moda həftəsi çərçivəsində Miuccia Prada "Versace" ilə bağlı danışıqların "hamının gündəmində" olduğunu bildirib.
"Capri" uzunmüddətli perspektivdə "Versace"nin inkişafına nikbin yanaşsa da, şirkətin proqnozlarına əsasən, brendin satışları cari maliyyə ilində 810 milyon dollardan gələn il 800 milyon dollara düşəcək. Bununla belə, 2028-ci ilə qədər bu rəqəmin 900 milyon dollara, uzunmüddətli perspektivdə isə 1,5 milyard dollara çatacağı gözlənilir.
"Capri"nin maliyyə çətinlikləri
Reytinq agentliyi "S&P Global Ratings" fevral ayında "Capri"nin borc reytinqini aşağı salıb. Agentlik bildirib ki, şirkətin maliyyə göstəricilərindəki gərginlik və yüksək borclanma səviyyəsi borcların qaytarılmasında problemlərə səbəb ola bilər.
"Capri" 2024-cü ildə daha bir çətinliklə üzləşib. ABŞ-nin Federal Ticarət Komissiyası ("FTC") rəqabət qaydalarını əsas gətirərək, "Capri"nin 8,5 milyard dollara "Coach" brendinin sahibi "Tapestry" tərəfindən satın alınmasını bloklamaq üçün məhkəməyə müraciət edib.
Rəhim
