"Google" şirkəti işıq şüaları vasitəsilə, kabelə ehtiyac olmadan yüksək sürətli internet təqdim edəcək "Taara" adlı layihəsi ilə internet bağlantısında inqilabi yenilik vəd edir.
Valyuta.az xəbər verir ki, "Google" tədqiqatçıları internetə çıxışı tamamilə dəyişə biləcək texnologiya üzərində çalışdıqlarını açıqlayıblar. Şirkət, işıq şüaları ilə yüksək sürətli internet təmin edə biləcək çip hazırladıqlarını bildirib.
"Taara" kod adı ilə tanınan bu layihə üzrə komanda cümə günü verdiyi açıqlamada, işıq əsaslı yüksək sürətli interneti reallaşdırmağa yaxın olduqlarını qeyd edib. "Taara" çipi "silikon fotonika çipi" olub, kabelsiz şəkildə məlumat ötürmək üçün işığı istiqamətləndirə, izləyə və tənzimləyə bilir. Çipin cəmi bir dırnaq böyüklüyündə olması isə onu daha da cəlbedici edir.
"Taara"nın iş prinsipi, əslində fiber optik kabellərlə oxşardır. Fiber optik kabellər də məlumat ötürmək üçün işıqdan istifadə edir, lakin bu ötürmə bahalı yeraltı kabellər vasitəsilə həyata keçirilir. "Taara" isə fiziki kabelə ehtiyac duymadan, birbaşa görünməz işıq şüaları ilə məlumat ötürür. Bu texnologiya 20 Gbps kimi yüksək sürətlərdə məlumat ötürə bilir və hazırda 20 kilometrdən artıq məsafədə işləyə bilir.
Əlbəttə işıqla məlumat ötürülməsi sahəsində çalışan yeganə şirkət "Google" deyil. Artıq on ildən çoxdur ki, "Li-Fi" konsepsiyası araşdırılır və son illərdə populyarlığı artıb. 2023-cü ildə IEEE bu texnologiyanı rəsmi olaraq tanıyıb və standartlar yaratmağa başlayıb. "Starlink" də alçaq orbitdəki peyklərdən yerüstü stansiyalara məlumat ötürmək üçün lazerlərdən istifadə edir.
Lakin "Taara" peykdən yerə məlumat ötürmək əvəzinə, quru səthində məlumat ötürülməsinə fokuslanır. İşıq körpüləri bir-birini görə bildiyi müddətcə əlaqə quraraq məlumat mübadiləsi edə bilir. "Google" hazırda quşlar, yağış və duman kimi maneələri etibarlı şəkildə aradan qaldırmaq üzərində işləyir. Texnologiya sahə sınaqlarından keçir və mobil şəbəkələri dəstəkləmək kimi sahələrdə fəal şəkildə istifadə olunur.
Paşa Məmmədli
