Texnologiya dünyasının ən nüfuzlu şəxslərindən biri olan Mark Zukerberqin sərvəti 200 milyard dolları ötüb.
Valyuta.az xəbər verir ki, 2024-cü il göstəricilərinə əsasən, "Meta"nın qurucusu və CEO-su Mark Zukerberq 187 milyard dollarlıq xalis sərvəti ilə dünyanın ən varlı şəxsləri siyahısına daxil olub. Zukerberqin "Meta"dakı 13%-lik payı onun sərvətinin əsas mənbəyidir. 2024-cü ildə "Meta" səhmlərinin dəyərinin artması nəticəsində o, sərvətinə əlavə 78 milyard dollar qatıb. Bu isə onu dünyanın ən varlı ikinci şəxsi mövqeyinə yüksəldib.
Sadə həyat tərzi ilə tanınan milyarder sərvətinin əhəmiyyətli hissəsini daşınmaz əmlaka yatırır. 2011-ci ilin mayında Palo Altoda 7 milyon dollara 464 kvadratmetrlik bir ev satın alıb və sonradan bu evi süni intellektlə idarə olunan xüsusi köməkçi ilə təchiz edib. "The Wall Street Journal"ın məlumatına görə, daha sonra həmin evin ətrafındakı dörd evi də almaq üçün əlavə 43 milyon dollar xərcləyib. Bu addım məxfiliyini artırmaq məqsədilə atılıb.
2013-cü ildə 10 milyon dollara aldığı San-Fransiskodakı malikanəni 2022-ci ildə 31 milyon dollara satıb. Bu, bölgənin ən bahalı daşınmaz əmlak satışlarından biri olub. Havay adalarında isə ümumilikdə 2800 hektardan çox torpaq sahəsinə sahibdir. Bu ərazilər üçün təxminən 200 milyon dollar xərclədiyi bildirilir.
Zukerberq həyat yoldaşı Prissilla Çan ilə birlikdə sərvətlərinin böyük hissəsini xeyriyyəçilik və sosial layihələrə yönəldirlər.
Milyarder "CZI", K-12 təhsil sisteminə investisiya edərək süni intellekt dəstəkli öyrənmə layihələrinə maliyyə ayırır. Bu təşəbbüslər, texnologiyanın təhsilə inteqrasiyasını gücləndirmək və öyrənmə proseslərini daha əlçatan etmək məqsədi daşıyır. Mark Zukerberq və Prissilla Çan yalnız texnologiya sahəsində yeniliklər etməklə kifayətlənmir, eyni zamanda sərvətlərini "cəmiyyətə fayda verən layihələr"ə yönəldən şəxslər arasında yer alır.
Sərvanə Rəmixanova
