İlon Maskın Almaniya seçkilərində ifrat sağçı Almaniya üçün Alternativ Partiyasını (AfD) açıq şəkildə dəstəkləməsindən sonra "Tesla"nın satışları kəskin şəkildə azalıb.
HİT.az xəbər verir ki, Almaniyanın KBA federal nəqliyyat orqanı fevral ayında Avropanın ən böyük avtomobil bazarında ABŞ qrupunun yalnız 1429 elektrikli avtomobilini qeydə alınıb. Bu rəqəm əvvəlki illə müqayisədə satışların 76 faizdən çox azalması deməkdir.
Maskın Almaniya siyasətinə müdaxilə cəhdlərindən sonra yanvar ayında "Tesla" satışları təxminən 60 faiz azalıb. 2025-ci ilin ilk iki ayında qrupun Almaniyadakı satışları 70 faiz düşüb.
Fevralın 23-də keçirilən ümumi seçkilərdə ifrat sağçı Almaniya üçün Alternativ (AfD) partiyası 21 faizə yaxın səs toplayaraq tarixi nəticə əldə edib. Mask özünün X sosial media platformasında AfD-yə dəstəyini ifadə edərək, Almaniyanı yalnız ifrat sağçı partiyanın xilas edə biləcəyini bildirib.
Seçkilərdə güclü performans göstərməsinə baxmayaraq, AfD Almaniya parlamentindəki digər partiyalar tərəfindən marginallaşdırılır. Çünki bu partiyalar Almaniyanın keçmişini nəzərə alaraq ifrat sağçılarla işləməkdən imtina edirlər.
Almaniyada elektrikli avtomobillərin satışı keçən il hökumətin əsas subsidiya proqramını geri götürməsindən və Avropada akkumulyatorla işləyən avtomobillərə tələbatın azalmasından sonra azalıb. Lakin "Tesla" satışlarının azalması elektrik avtomobil sektorunda canlanma ilə ziddiyyət təşkil edir.
Almaniyada fevral ayında təxminən 36 min akkumulyatorla işləyən avtomobil qeydə alınıb ki, bu da keçən ilin eyni ayı ilə müqayisədə təxminən 31 faiz artım deməkdir. Yeni avtomobil qeydiyyatına alınanların ümumi sayı əvvəlki ayla müqayisədə 6,4 faiz azalaraq 203,4 minə düşüb.
Samir
