Sovet dövründən fasiləsiz olaraq yayımlanan, sirri hələ də açılmamış və həvəskar radio dinləyiciləri tərəfindən “Qiyamət radiosu” kimi tanınan UVB-76 son illərin fevral ayında ən yüksək yayım trafikini qeydə alıb. “UVB-76 Logs” Telegram kanalına görə, stansiya keçən ay 46 dəfə yayımlanıb və ən yüksək aktivlik fevralın 12-də, ABŞ prezidenti Donald Tramp və Rusiya prezidenti Vladimir Putinin telefon danışığı olduğu gün olub. Həmin gün UVB-76 25 fərqli mesaj yayımlayıb və ilk sözlər “sinopsis” və “narta” idi.
Hafta.az-ın yazdığına görə, UVB-76-nın şifrəli mesajlarına “bulvar”, “plagiyat”, “odofert” və “mikropora” kimi mənasız görünən sözlər daxil idi. Sonuncu "yotolast" və "runik" sözləri martın 3-də eşidilib. UVB-76 1970-ci illərdən bəri fasiləsiz olaraq qısadalğalı radiotezlikdə siqnal yayımlayır, bəzən hərflərin, rəqəmlərin və sözlərin təsadüfi birləşmələrini ötürür. Mesajların mənasını deşifrə etmək mümkün olmasa da, bəzi ekspertlər bu yayımın Rusiyanın nüvə hücumunun qarşısının alınması sistemlərindən biri olan “Perimetr”ə bağlı ola biləcəyini düşünürlər.
Rusiya Dövlət Duması Müdafiə Komitəsinin sədri Andrey Kartapolov Perimetr sistemi ilə bağlı iddiaları rədd edərək, UVB-76-nın konkret missiyası olduğunu, lakin bunun nüvə hücumunun qarşısının alınması ilə heç bir əlaqəsi olmadığını bildirib. Təxminlərə görə, radiostansiyanın mesajları Vernam şifrələmə üsulu ilə kodlaşdırılır və yalnız şəxsi açarla deşifrə edilə bilər. UVB-76-nın artan yayım trafiki radio həvəskarları və təhlükəsizlik mütəxəssisləri tərəfindən diqqətlə izlənməyə davam edir.
