BAKI, TurkicWorld
ABŞ Ədliyyə Departamenti San-Fransiskodakı Kaliforniya Universitetində antisemit fəaliyyətlərə icazə verilib-verilmədiyini araşdırmaq üçün vətəndaş hüquqları üzrə istintaq başladıb.
TurkicWorld AzerVoice-a istinadən xəbər verir ki, nazirliyin rəsmi açıqlamasına görə, istintaq universitetin 1964-cü il Mülki Hüquqlar Aktını pozub-pozmadığını müəyyən edəcək. Əgər qanun pozuntusu təsdiqlənərsə, universitet sanksiyalarla üzləşə və federal maliyyədən məhrum edilə bilər.
“Ədliyyə Departamenti yəhudi amerikalıların vətəndaş hüquqlarını qorumağa və universitetlərdə antisemitizmlə mübarizəyə sadiq qalacaq”, – deyə ABŞ prokuroru Pam Bondi bildirib.
Qeyd edək ki, Tramp administrasiyası universitetlərdəki Fələstin tərəfdarı etirazları “antisemitizm” kimi xarakterizə edib, lakin tənqidçilər İsrail hökumətinin siyasətini tənqid etməyin antisemitizmlə eyni olmadığını vurğulayırlar.
Bundan əvvəl, yanvarın 30-da Prezident Tramp Fələstinə dəstək nümayişlərində iştirak edən tələbələrin deportasiyasına icazə verən sərəncam imzalayıb.
