Fairmont Baku, Flame Towers hotelində ilin maraqlı tədbirlərindən biri – Bakı Xeyriyyə Vyana Balı keçirilib. Zəriflik və ənənələrin xeyriyyəçiliklə qovuşduğu bu möhtəşəm gecə, bir daha mədəniyyətin, gözəlliyin və xeyirxahlığın rəmzi olduğunu sübut edib.
Ənənələr dünyanı birləşdirir
Vyana Balının Bakıya möhtəşəm qayıdışından sonra təşkilatçılar bu tədbirin təkcə illik bir ənənəyə deyil, həm də mühüm beynəlxalq platformaya çevriləcəyinə inanırlar. Bal mədəni və işgüzar əlaqələri gücləndirmək, təcrübə mübadiləsi aparmaq və insanları nəcib bir məqsəd naminə bir araya gətirmək üçün unikal imkanlar yaradır.
Vyana meriyası və Avstriyanın Azərbaycandakı səfirliyinin himayəsi altında keçirilən balın qonaqları əsl mədəni dialoqun bir hissəsinə çevriliblər. Valsın füsunkar melodiyaları, eleqant geyimlər və aristokratik atmosfer gecə iştirakçılarını sanki Vyananın qəlbinə aparıb.
Təntənəli açılış və gecənin qəhrəmanları
Ənənəyə uyğun olaraq, bal debütantların çıxışı ilə başlayıb ki, bu da onların ali cəmiyyətə ilk addımını simvolizə edir. Bakı Kamera Orkestrinin (IMEC) müşayiəti ilə zərif musiqi fonunda gənc cütlüklər zəriflik və həyəcanla gecəni açaraq, qonaqları heyran ediblər.
Azərbaycanın Əməkdar artisti Nərgiz Kərimova ruhlandırıcı çıxışı ilə auditoriyanı valeh edib, gecənin aparıcısı Emin Musavi isə tədbirə rahatlıq və ilham qatıb.
Balın kral və kraliçasının seçimi
Ənənəyə əsasən, Bakı Xeyriyyə Vyana Balının təşkilat komitəsi debütantlar arasında Şahzadə və Şahzadə xanımı, eləcə də yetkin iştirakçılar arasında Balın kral və kraliçasını seçib. Bu fəxri titullar təkcə rəqsdə deyil, eyni zamanda xeyriyyə təşəbbüslərində fəal iştirak edərək başqalarına ilham verən insanlara təqdim olunur.
Balın şahzadəsi və şahzadə xanımı – Murad Ələkbərli və Angelina Pons Mahmudova (European Azerbaijan School-un şagirdləri).
Balın kraliçası – Azərbaycanın Əməkdar artisti Nərgiz Kərimova.
Bakı Xeyriyyə Vyana Balı 2025-in kralı – Azərbaycanın Əməkdar jurnalisti Emin Musavi.
Dünyanı daha yaxşı edən bal
Xeyriyyəçilik bu zərif gecənin əsas mahiyyətidir. Tədbir çərçivəsində təşkil olunan hərracdan əldə edilən gəlir Heydər Əliyev Fondu və SOS Children's Villages beynəlxalq təşkilatına ianə edilərək qayğı və dəstəyə ehtiyacı olan uşaqlara yönləndirilib.
Balın təşkilatçıları – The One in a Million biznes-klubu və onun Bakıdakı tərəfdaşı Lidiya Əliyeva-Şestak vurğulayıblar ki, onların əsas məqsədi təkcə mədəni ənənələri qorumaq deyil, həm də insanları incəsənət vasitəsilə bir araya gətirərək beynəlxalq əməkdaşlığı inkişaf etdirməkdir.
Bu sehrli gecə son valsın sədaları altında başa çatıb. Lakin Bakı Xeyriyyə Vyana Balı "sağ ol" demir, o, "gələn görüşlərədək" deyir!
