"ByteDance" Ltd. ABŞ-dəki əməkdaşlarının səhmlərini təxminən 312 mlrd. dollar dəyərində geri almağı planlaşdırır. Bu, əvvəlki qiymətləndirmələrlə müqayisədə əhəmiyyətli bir artımdır və Çin texnologiya şirkətlərinin perspektivlərinin yaxşılaşdığını göstərir.
Valyuta.Az xəbər verir ki, "TikTok"un sahibi ABŞ-də çalışan əməkdaşlarına hər səhm üçün təxminən 189,90 dollar təklif edir. Məsələ ilə tanış olan bir mənbənin verdiyi məlumata görə, bu məbləğ altı ay əvvəl təklif olunan 181 dollardan yüksəkdir.
Son aylarda investorlar "ByteDance"i daha yüksək qiymətləndiriblər, baxmayaraq ki, ABŞ hökuməti "TikTok"un ya satılmasını, ya da ölkədə bloklanmasını tələb edir. 2025-ci ildə Çin texnologiya səhmlərinə maraq artıb. Xüsusilə "DeepSeek"in qlobal debütü ölkənin texnologiya sektorunun yenidən dəyərləndirilməsinə səbəb olub.
Çin prezidenti Si Cinpinin ötən ay texnologiya şirkətlərinə ictimai dəstəyi, hökumətin bu sektoru strateji baxımdan vacib hesab etdiyini və Amerika texnologiyalarından asılılığın azaldılması üçün dəstək verə biləcəyini göstərir.
"ByteDance"in əsas investorlarından ən azı üçü – "SoftBank Group Corp.", "Fidelity Investments" və "T. Rowe Price Group Inc." – şirkətin daxili qiymətləndirməsini 400 mlrd. dollardan yuxarı qaldırıb.
Ötən ilki illik səhm geri alımı zamanı "ByteDance" hər səhm üçün təxminən 180 dollar təklif etmişdi ki, bu da şirkətə 300 mlrd. dollar dəyər qazandırırdı. Bu qiymətləndirmə, 2023-cü ildəki 268 mlrd. dollarlıq dəyərdən yüksək idi.
Bir çox investorlar "TikTok"un ABŞ-dəki fəaliyyətinə dair geosiyasi risklərə diqqət yetirsə də, digərləri "ByteDance"in süni intellekt sahəsindəki gücünü nəzərə alırlar. Şirkətin "Doubao" adlı süni intellekt çatbotunun 75 milyon daimi aktiv istifadəçisi var. Bundan əlavə, "ByteDance" daha əvvəl təqdim etdiyi vizual analiz modelinin bazar orta göstəricisindən 85% daha ucuz olduğunu bildirib ki, bu da "DeepSeek"ə bənzər bir üstünlükdür.
Rəhim
