Uzun müddət "Google"da rəhbər vəzifədə çalışan Ceni Vud (Jenny Wood) iş görüşmələrində, görüşmədən əvvəl diqqət edilməli 3 məqamı vurğulayıb.
Valyuta.Az xəbər verir ki, o, həmçinin namizədlərin iş və şəxsi həyat balansı ilə bağlı suallar verməsini bəyənmədiyini bildirib.
Onun sözlərinə görə, iş görüşməsindən əvvəl namizədlər çox vaxt səhvən düşünürlər ki, müsahibə yalnız görüş zamanı baş verən 30 dəqiqədən ibarətdir. Halbuki müsahibə prosesin əvvəlindən, hətta bəzən CV-yə baxıldığı andan başlayır.
Bəs seçilmək üçün nə etmək lazımdır? Vud işəgötürənlərin diqqətini çəkmək üçün bu addımları tövsiyə edir.
1. Vəzifəyə dair bir səhifəlik plan hazırlayın
İlk olaraq, müsahibəyə getməzdən əvvəl vəzifənizlə bağlı bir səhifəlik plan hazırlayın və onu potensial işəgötürənlə bölüşün. Bu planda şirkətin əsas istiqamətlərini və sizin bu sahələrə necə töhfə verə biləcəyinizi qeyd edin.
Məsələn, dondurma məhsulları satan bir şirkətdə işləmək istəyirsinizsə, planınızda aşağıdakı üç əsas sütunu göstərə bilərsiniz:
- Gəlir: şokoladlı dondurma satışını hər il 3% artırmaq
- Əməliyyatlar: pərakəndə satış tərəfdaşlarının məmnuniyyətini hər il 5% yüksəltmək
- Komanda: ilk 90 gün ərzində bir komanda quruculuğu tədbiri təşkil etmək
Müəllimlər üçün isə belə bir plan tərtib edilə bilər:
- Akademik nəticələr: dövlət üzrə riyaziyyat ballarını 13% artırmaq
- Sosial fəaliyyət: valideyn-müəllim assosiasiyasında iştirak etmək
- Əlavə dərsdənkənar fəaliyyətlər: robot texnologiyaları klubuna rəhbərlik etmək
Bu cür bir plan sizin işə necə töhfə verəcəyiniz barədə aydın təsəvvür yaradır. Sənədi PDF formatında, "PowerPoint" və ya "Google Slides" vasitəsilə hazırlayıb, görüşdən 24 saat əvvəl göndərə bilərsiniz. Bundan əlavə, müsahibə zamanı onu uyğun bir məqamda təqdim edib belə deyə bilərsiniz: "Bu, əslində hazırladığım iş planına uyğundur. Gəlin, onu ekranda göstərim."
Vudun sözlərinə görə, o, "Google"dakı bir neçə vəzifəsini məhz bu strategiya ilə əldə edib.
2. "LinkedIn"də şirkət haqqında paylaşım edin
Potensial işəgötürənlər iş görüşməsindən 24 saat əvvəl sizin "LinkedIn" profilinizə baxacaqlar. Əgər görüşdən bir neçə gün əvvəl müsahibə vermək istədiyiniz şirkət haqqında müsbət bir paylaşım etsəniz, bu, onların diqqətini çəkəcək.
Məsələn, "Salesforce" şirkətində işləmək üçün müsahibəyə gedirsinizsə, belə bir paylaşım edə bilərsiniz:
"Bu gün 'Salesforce'un yeni süni intellekt məhsulu ilə bağlı maraqlı bir məqalə oxudum."
Bu paylaşım uzun olmamalıdır – 7 cümlədən çox olmamaq şərti ilə qısa və yığcam yazın. Vud bildirir ki, bu cür postlar namizədin proaktiv, məlumatlı və işə həvəsli olduğunu göstərir.
3. "LinkedIn"də səsli mesaj göndərin
Müsahibədən əvvəl sizi dinləyəcək insanları tapıb "LinkedIn" üzərindən onlarla əlaqə qurun və görüşdən 24 saat əvvəl hər birinə qısa bir səsli mesaj göndərin.
Məsələn, mesajda belə deyə bilərsiniz:
"Salam, Ceyn! Sabah sizinlə görüşəcəyimiz üçün çox həyəcanlıyam. Bu vəzifə bacarıq və təcrübələrimlə mükəmməl uyğunluq təşkil edir. Şirkətə dəyər qatmaq üçün böyük imkanlar görürəm. Sabah görüşərik!"
Vud deyir ki, "LinkedIn"də çoxlu ismarıc alır, amma səsli mesajlar həmişə diqqətini çəkir. "Mən onların hər birinə mütləq qulaq asıram", – deyə o bildirir.
Bu üç üsul, Vudun fikrincə, sizi işəgötürənin yaddaşında saxlayır və namizəd kimi seçilmə şansınızı artırır.
Rəhim
