Azərbaycan güləşçisi Avropa çempionu oldu

  Albaniyanın paytaxtı Tiranada güləş üzrə Avropa çempionatı (U23) davam edir.

Referans.az xəbər verir ki, bu gün sərbəst güləş üzrə 61, 74, 86, 92 və 125 kq-da medalçılar müəyyənləşib.

Ceyhun Allahverdiyev (61 kq) finalda ermənistanlı Levik Mikayelyana 1:2 hesabıyla məğlub olaraq, gümüş medal qazanıb.

Ağanəzər Novruzov (74 kq) həlledici görüşdə rusiyalı İsmayıl Xaniyevlə qarşılaşıb. İlk hissədə 0:5 geri düşən Ağanəzər görüşün sonlarında fəallaşıb. Rəqibindən 4 xal almağı bacaran Novruzov minimal fərqlə məğlub olub və ikinci yeri tutub.

Arseniy Djioyev (86 kq) finalda fransalı Raxim Maqamadovla üz-üzə gəlib. Görüşü 9:2 hesablı qələbə ilə başa vuran Azərbaycan təmsilçisi Avropa çempionu olub.

Sadiq Mustafazadənin (92 kq) bürünc medal uğrunda gürcüstanlı Sandro Kuraşviliylə qarşılaşması gərgin mübarizə şəraitində keçib. Rəqibini 5:3 hesabıyla üstələyən Sadiq bürünc medalı boynundan asıb.

Yusif Dursunov (125 kq) gündüz seansında baş tutan təsəlliverici görüşdə rusiyalı Artyom Puxovskini mübarizədən kənarlaşdırıb – 4:2. Dursunov daha sonra türkiyəli idmançıya “tuş”la qalib gələrək üçüncü yeri tutub.