Çinli tədqiqatçılar məlumat saxlama texnologiyasında inqilabi dəyişiklik edə biləcək orqanik materiallara əsaslanan yeni növ sabit disklər hazırlamaq üzərində çalışırlar.
HUT.az xəbər verir ki, əgər bu layihə uğurlu olarsa, ənənəvi sabit disklər tarixə qovuşa bilər.
Mövcud mexaniki modellərlə müqayisədə altı dəfə daha çox məlumat saxlama potensialına malik bu yeni sabit disk texnologiyası, orqanik materiallardan istifadə etməklə hazırlanır.
Ənənəvi sabit disklər məlumatları ikili sistemdə – maqnitləşdirilmiş sahələr vasitəsilə saxlayır. Çinli tədqiqatçılar isə "molekulyar sabit disklər" adlandırılan yeni texnologiyanı inkişaf etdirirlər. Bu sistem Ru X LPH kimi orqanometalik kompleks molekullardan təşkil olunmuş öz-özünə düzülən təkqatlı strukturlardan istifadə edir. Yeni texnologiya bit başına cəmi 2,94 pikovatt enerji sərf etməklə ultra aşağı güc istehlakını təmin edir və məlumat sıxlığını əhəmiyyətli dərəcədə artırır.
Qısaca desək, bu yeni orqanik sabit disklər son dərəcə az enerji sərf edərək məlumat saxlaya bilir.
Bu molekulyar HDD-lərin işləməsində mühüm rol oynayan elementlərdən biri də mexaniki proqramlaşdırma və oxuma funksiyasını yerinə yetirən xüsusi mikroskop ucluğudur (C-AFM). Nanoölçülü həssaslığa malik bu ucluq, molekulyar keçiricilik vəziyyətləri üzərində dəqiq nəzarəti təmin edir və çox kiçik sahədə çoxlu bit saxlamağa imkan yaradır.
Molekulyar sabit disklərin digər mühüm üstünlüklərindən biri də yüksək təhlükəsizlik səviyyəsi təklif etməsidir. Ənənəvi sabit disklərdə ayrıca şifrələmə mexanizmlərinə ehtiyac duyulduğu halda, bu yeni texnologiya molekulyar səviyyədə XOR şifrələməsi ilə təchiz edilib. Bu imkan sayəsində əlavə avadanlıq tələb olunmadan məlumatların təhlükəsiz şəkildə kodlanması və oxunması mümkün olur, bu da kibertəhlükələrə qarşı qorumanı gücləndirir.
Tədqiqatın nəticələri "Nature Communications" jurnalında dərc olunub. Alimlər gələcək araşdırmaların bu texnologiyanın geniş miqyasda tətbiqini asanlaşdırmağa, keçiricilik vəziyyətlərini təkmilləşdirməyə və ətraf mühitə həssaslığını azaltmağa yönələcəyini bildirirlər.
Samir
