Dünya üzrə elektrikli avtomobil satışları yanvar-fevral aylarında illik müqayisədə 30% artıb. Lakin ABŞ-ın ən böyük elektrikli avtomobil istehsalçısı olan "Tesla"nın satışları, xüsusilə Avropa və Çində kəskin şəkildə azalıb. Bunun əksinə olaraq, ABŞ-ın tətbiq etdiyi gömrük rüsumlarına baxmayaraq, Çin markası BYD yüksəlişə keçib.
Valyuta.az xəbər verir ki, Britaniya mərkəzli tədqiqat şirkəti "Rho Motion"un açıqladığı məlumatlara görə, elektrikli avtomobil satışları artmağa davam edir.
Fevral ayında dünya üzrə elektrikli avtomobil satışları illik müqayisədə 49% artaraq 1,2 milyon ədədə çatıb. Bununla belə, fevral satışları 2024-cü ilin yanvar ayı ilə müqayisədə 3% azalıb.
Yanvar-fevral aylarını əhatə edən iki aylıq dövrdə isə qlobal elektrikli avtomobil satışları ötən ilin eyni dövrü ilə müqayisədə 30% artaraq 2,4 milyon olub.
Bu müddətdə 1,4 milyon satış yalnız Çində qeydə alınıb və ölkədə elektrikli avtomobil bazarı illik müqayisədə 35% böyüyüb. Çin bazarında ilin ilk iki ayında 130 min BYD markalı avtomobil satılıb.
Avropa İttifaqı (Aİ), Avropa Azad Ticarət Assosiasiyası (EFTA) ölkələri və Böyük Britaniyada elektrikli avtomobil satışları yanvar-fevral dövründə illik müqayisədə 20% artaraq 500 minə çatıb. Bir çox Avropa ölkəsində satışlar artmaqda davam etsə də, Fransada bu ilin yanvarında qüvvəyə minən yeni vergi səbəbindən bazar zəifləyib.
Elektrikli avtomobil satışları ABŞ, Meksika və Kanadada da eyni dövrdə 20% artaraq 300 minə yüksəlib.
ABŞ-da elektrikli avtomobil satışları ilin ilk iki ayında 28% artım göstərib. Ölkənin keçmiş prezidenti Donald Tramp elektrikli avtomobillərə tətbiq olunan stimullaşdırıcı güzəştləri ləğv edəcəyini açıqlasa da, bu güzəştlər tamamilə qüvvədən düşənə qədər istehlakçıların onlardan faydalanmağa davam edəcəyi proqnozlaşdırılır.
Dünyanın digər bölgələrində isə elektrikli avtomobil satışları yanvar-fevral aylarında 35% artaraq 200 minə çatıb.
"Rho Motion"un məlumatlarına görə, ABŞ-ın ən iri elektrikli avtomobil istehsalçısı olan "Tesla" Avropa və Çindəki satışların azalması ilə 2025-ci ilə zəif bir başlanğıc edib. Şirkətin Avropadakı satışları yanvar ayında 47%, Çində isə 15% azalıb. "Tesla"nın Fransa, Almaniya, Böyük Britaniya və Belçikadakı satışları 63% azalma ilə kəskin geriləyib.
Analitiklər hesab edirlər ki, Avropa istehlakçıları amerikalı milyarder iş adamı İlon Maskın regionun siyasətinə qarışmasına etiraz olaraq "Tesla" almaqdan imtina edirlər.
"Rho Motion"un məlumat rəhbəri Çarlz Lester elektrikli avtomobil bazarına dair şərhində fevral ayında satışların təxminən 50% artmasının "güclü bir başlanğıc" olduğunu bildirib və bu artımın əsasən Çin bazarından qaynaqlandığını qeyd edib.
Lester xüsusilə Avropanın yüksək gömrük tariflərinə baxmayaraq, BYD-nin daxili və xarici bazarda tələbinin davam etdiyini vurğulayıb:
"Avropada batareyalı elektrikli avtomobillər ilin əvvəlindən bəri 29% artımla bazarın diqqət mərkəzində olub. Lakin Fransanın bu nəqliyyat vasitələrinə tətbiq etdiyi yeni vergi, ölkədə satışların demək olar ki, 50% azalmasına səbəb olub".
Lester həmçinin Şimali Amerikada ilin ilk iki ayında 20%-lik stabil artım müşahidə edildiyini bildirərək, ABŞ-lı sürücülərin vergi güzəştləri qüvvədən qalxmadan onlardan faydalanmaq üçün 30% daha çox elektrikli avtomobil satın aldıqlarını qeyd edib.
Paşa Məmmədli
