Fransanın PSJ klubunun italiyalı qapıçısı Canluici Donnarumma UEFA Çempionlar Liqasında (ÇL) həftənin oyunçusu seçilib.
Arena.az bu barədə UEFA-nın rəsmi saytına istinadən xəbər verir.
İtaliyalı qolkiper ÇL-in 1/8 final mərhələsinin “Liverpul”a (İngiltərə) qarşı cavab matçının penaltilər seriyasında iki zərbəni dəf edərək, parislilərin 1/4 finala yüksəlməsində pay sahibi olub.
Xatırladaq ki, həftənin oyunçusu adına Harri Keyn (“Bayern”, Almaniya), Marko Asensio (“Aston Villa”, İngiltərə) və Emre Can (“Borussiya”, Almaniya) da namizəd idilər. Amma UEFA-nın rəsmi saytındakı sorğuya qatılmış respondentlər məhz Donnarummanı ən yaxşı seçiblər.
Canluici Donnarumma 2021-ci ilin iyulundan PSJ-də çıxış edir. Qapıçı “Milan”dan sərbəst transferlə parislilərin düşərgəsinə keçib. Tərəflər arasındakı müqavilə 2026-cı ilin iyun ayının sonuna qədər nəzərdə tutulub.
Cari mövsümdə italyan qapıçı parislilərin hetyətində 30 oyuna çıxıb, 28 qol buraxıb, 9 oyunda qapısını toxunulmaz saxlayıb.
Canluici Donnarummanın PSJ-də çıxışının ümumi mənzərəsi 144 oyun, 141 buraxılmış qol və 48 “quru” oyundan ibarətdir.
Futbol uğurlarına gəlincə, Donnarumma “Milan”la İtaliya Super Kubokunun (2016/2017), PSJ ilə Fransa Liqa 1-nin (2021/2022, 2022/2023, 2023/2024), Fransa Kubokunun (2023/2024), Fransa Super Kubokunun (2022/2023, 2023/2024) qalibi olub.
Donnarumma 2016-cı ilin sentyabr ayında debüt etdiyi və hazırda kapitanı olduğu İtaliya yığma komandasının heyətində 70 oyun keçirib, 58 qol buraxıb, 29 oyunda qapısının toxunulmazlığını təmin edib. Donnarumma “skuadra adzurra” ilə 2021-ci ildə İngiltərədə keçirilmiş Avropa çempionatının qalibi olub.
“Transfermarkt” internet-portalı 25 yaşlı italyan qapıçının transfer dəyərini 35 milyon avro məbləğində qiymətləndirir.
