İngiltərədə ibtidai sinif müəllimi Elli Hart təmizlik işləri apararkən içində ərinin 3,8 milyon dollar dəyərində bitkoini olan fleş-diski səhvən zibilə atıb.
Publika.az xəbər verir ki, o, təmizlik zamanı köhnə qəbzlər və batareyalar arasında qara rəngli fleş-disk tapıb. Onu lazımsız hesab edən qadın əri Tomdan heç nə soruşmadan cihazı atıb.
"Tom fleş-diskin harada olduğunu məndən soruşduqda donub qaldım. Biz bütün zibil qutularını axtardıq, amma çox gec olduğunu bilirdik", - deyə Elli etiraf edib.
Veb tərtibatçısı olan Tom həmin bitkoinləri kriptovalyutanın xeyli ucuz olduğu 2013-cü ildə alıbmış. İllər keçdikcə onun dəyəri astronomik məbləğə çatıb.
Cütlük bildirib ki, şokedici hadisəyə baxmayaraq, münasibətlərini qorumağa çalışırlar. Ellinin sözlərinə görə, Tom onu günahlandırmayıb, lakin itkinin ağırlığı "hər sükutda hiss olunur".
