Gürcüstanın baş naziri İrakli Kobaxidze Tbilisidəki “Expo Georgia” sərgi kompleksində Avropa Gününün açılışında çıxış edib.
Hafta.az-ın yazdığına görə, Gürcüstan Avropa İttifaqına üzvlüyə namizəd ölkə kimi ilk dəfə Avropa Gününü qeyd edir.
Kobaxidze deyib ki, Avropa İttifaqına üzvlük onun hökumətinin “əsas xarici siyasət prioriteti” olaraq qalır. Eyni zamanda, o hesab edir ki, “Avropa İttifaqının dirçəlişinə töhfə vermək lazımdır”.
“Təbii ki, yolumuz yalnız Avropa İttifaqından keçir və əsas xarici siyasət prioritetimiz Avropa İttifaqına üzvlükdir. Əminəm ki, bu gün Avropa İttifaqının üzləşdiyi iqtisadi və ya dəyər problemləri müvəqqətidir və bizim böyük avropalılar qarşısında borcumuzdur ki, hər birimiz 1950-ci il mayın 9-da əsası qoyulan ittifaqın bərpasına öz töhfəmizi verək”, - Kobaxidze deyib.
Düsseldorfdakı tələbəlik illərini xatırladan Baş nazir əlavə edib ki, Gürcüstan hakimiyyəti Avropa İttifaqında olduğu kimi inkişaf və rifah səviyyəsini istəyir. Baş nazir vurğulayıb ki, qanunun aliliyi, demokratiya və insan hüquqları kimi dəyərlər rifahın daim yüksəldilməsinin təminatına çevrilib.
“Avropanın mərkəzində, Düsseldorfda keçirdiyim üç ili, Avropa mədəniyyətinin keyfiyyəti və rifahı haqqında o zaman ilk əldən aldığım təəssüratı xatırlayıram. Bu, çox böyük təəssüratdır və biz Gürcüstanda məhz bu inkişaf səviyyəsinə və eyni rifah səviyyəsinə nail olmaq istəyirik”, - Kobaxidze bildirib.
Aİ-nin Gürcüstandakı nümayəndəliyi hər il Avropa Gününü bir sıra tematik tədbirlərlə qeyd edir. Tədbir Avropa ölkələrinin mədəniyyətinə və Tbilisi ilə Brüssel arasında əməkdaşlığa həsr olunub.
Bu gün “Expo Georgia” sərgisində Gürcüstan hökumətinin üzvləri ilə yanaşı, Aİ ölkələrinin səfirləri, Gürcüstanda təmsil olunan Avropa proqram və təşkilatlarının rəhbərləri də iştirak ediblər.
