Ukraynanın üçüncü prezidenti Viktor Yuşşenko deyib ki, ABŞ-ın hərbi yardımı gecikdirməsi Putinə Ukraynaya daha çox ziyan vurmağa imkan verən böyük gecikmədir.
HİT.az xəbər verir ki, o, bu barədə “Associated Press” agentliyinə müsahibəsində bildirib.
Onun sözlərinə görə, bu gecikmə Ukrayna üçün ölümcül deyil, lakin bu, Ukrayna hərbçilərini builki hərbi kampaniyaya yenidən baxmağa məcbur edib. O vurğulayıb ki, müttəfiqlər birləşsə, daha böyük uğurlar əldə edilə bilər.
“Putin üçün əsas geosiyasi problem azadlıq və demokratiyadır. Və bu gün o, Qərb dünyasının zəif və birləşmək iqtidarında olmadığını göstərmək üçün bütün mövcud resurslardan istifadə edir", deyə Yuşşenko bildirib.
Yuşşenko prezident Volodimir Zelenskinin müharibə aparmasını dəstəkləyib və bildirib ki, heç bir ukraynalı siyasətçi müharibəni bitirmək naminə ərazilərindən imtina etməyəcək. O qeyd edib ki, ABŞ və Avropanın sülh naminə belə bir sövdələşməni gözləməsi böyük səhv olacaq və bu, Putini yenidən hücuma keçməyə təşviq edəcək.
“Bu, Putinə 5-7 il vaxt verəcək ki, güclənsin və sonra yenidən bu vəhşiliklərə başlasın”, deyə keçmiş prezident bildirib.
O, Qərb müttəfiqlərini Ukraynaya kömək etmək üçün daha tez siyasi qərarlar qəbul etməyə çağırıb.
"Cəbhə xətti sutkada 24 saat işləyir", deyən keçmiş prezident əlavə edib ki, kəskin sursatın çatışmazlığı Ukrayna qüvvələrini cəbhə xəttində kənd-kənd təslim etməyə məcbur edib və Ukraynanın Qərb müttəfiqləri arasında Kiyevin perspektivləri ilə bağlı narahatlıq yaradıb.
“Və təbii ki, bu, dünyada Ukraynanın yanında olan və onu dəstəkləyənlərin mənəviyyatını sarsıdır", deyə sabiq prezident bildirib.
Yuşşenkonun sözlərinə görə, Ukrayna iki illik genişmiqyaslı müharibədə böyük itkilər verib və o, müharibə yorğunluğu ilə bağlı arqumentləri eşitməkdən utanır və bu, döyüşü dayandırmaq üçün bəhanə olmamalıdır:
"Hər gün bunun əvəzini canımızla ödəyirik. Uşaqların və qadınların həyatı, Ukrayna əsgərlərinin həyatı. İnfrastrukturumuz hər gün dağıdılır".
O, ölkə vətəndaşlarının verdiyi fədakarlıqları nəzərə alaraq Ukraynanın qələbəsini qaçılmaz hesab edir və bu müharibəni demokratiyanı tiranlıq və imperializmdən qorumaq üçün həlledici döyüş kimi görür.
Samir
