Azərbaycan Turizm Bürosu Hindistanın Mumbay şəhərində keçirilən, Asiya-Sakit okean regionunun mühüm turizm sərgisi olan “OTM Mumbai 2025”də iştirak edir.
Dövlət Turizm Agentliyinin məlumatına görə, tədbirdə "Azərbaycan Hava Yolları" ilə birlikdə 22 yerli turizm sənayesi nümayəndəsinin iştirakı ilə ölkə turizminin təbliği və təşviqi ilə bağlı B2B görüşlər keçirilir, əməkdaşlıq imkanları müzakirə olunur.
Milli stenddə ziyarətçilərə Azərbaycanın tarixi, mədəniyyəti, qış turizmi və dağ-xizək mərkəzləri, sağlamlıq, ekoturizm və digər turizm imkanları haqqında məlumat verilir.
Qeyd edək ki, hindistanlı turistlərin artan marağı nəzərə alınaraq AZAL və “IndiGo” aviaşirkətləri ilə Dehli və Mumbaydan Bakıya həftədə 14 birbaşa uçuş həyata keçirilir. 2024-cü ildə Azərbaycana səfər edən Hindistan vətəndaşlarının sayı 243 589 nəfər təşkil edib. Bu isə 2023-cü illə müqayisədə 2 dəfədən çox artımdır.
