Ermənistan Müdafiə Nazirliyi təlim-məşq toplanışlarında iştirakdan yayınmaya görə sanksiyaların sərtləşdirilməsini və səfərbərlik prosesində hərbi polisin rolunun aydınlaşdırılmasını təklif edir. Müvafiq layihə elektron hüquqi aktların elektron layihəsinin vahid internet saytında dərc olunub.
Herbiand.az bu barədə erməni mətbuatına istinadən bildirir.
Məlumata görə, mövcud qanunvericilik təlim-məşq toplanışından yayınmanın müxtəlif formalarını dəqiq müəyyən etmir. Bunun nəticəsində vətəndaşların bu prosesdən yayınması hallarını tam qiymətləndirmək mümkün deyil.
Müdafiə Nazirliyi hesab edir ki, yayınmaya görə cəzalar kifayət qədər yumşaqdır və bu, cəzadan yayınmağa imkan verir: “Səfərbərlik prosesinə cəlb olunması ilə bağlı hərbi polisin mövcud səlahiyyətləri dəqiqləşdirilməlidir”.
Bu dəyişikliklərin qəbulu qanunvericilik tənzimlənməsini sərtləşdirməyə, məsuliyyət səviyyəsini yüksəltməyə və səfərbərlik prosesinin tam həyata keçirilməsini təmin etməyə imkan verəcək.
Yeni qaydalar cərimə və qısamüddətli həbsdən (2 ay) uzunmüddətli həbsə (2 ilədək) qədər müxtəlif təsir növlərini nəzərdə tutur. Əgər yayınma sənəd saxtakarlığı ilə bağlıdırsa, həbs müddəti 2,5 ilə çata bilər. Eyni zamanda, təlimə çağırışın təşkilinə nəzarət prosesində hərbi polisin əhəmiyyətinin artırılması təklif olunur.
O cümlədən, hüdud-mühafizə orqanlarının tələbi ilə hərbi polisə təlim-məşq toplanışlarına çağırışdan yayınan şəxslərin axtarışı, yerinin müəyyən edilməsi və təlim-məşq toplanışlarına çağırışının təmin edilməsi üçün zəruri tədbirlər görmək, qanunvericiliklə müəyyən edilmiş qaydada hərbi qulluqçuların daşınmasını və müşayiət olunmasını təmin etmək hüququ veriləcək.
Bəxtiyar CƏFƏRLİ
