Futbol üzrə ölkə çempionatlarının yeni formatı bəlli oldu

Bu gün SOCAR-ın inzibati binasında AFFA İcraiyyə Komitəsinin növbəti iclası keçirilib.

"Football-plus.az" xəbər verir ki, bu haqda AFFA məlumat yayıb.

Qurumun prezidenti Rövşən Nəcəf iclasın gündəliyi barədə məlumat verib. Daha sonra gündəlikdə duran məsələlər müzakirə olunub.

Əvvəlcə Peşəkar Futbol Liqasının hesabatı dinlənilib. Qurumun vitse-prezidenti Aslan Şahgəldiyev Misli premyer-liqası, həmçinin 1-ci və 2-ci liqalarda mövsümün gedişi barədə məlumat verib. O, İcraiyyə Komitəsi üzvlərinin suallarını cavablandırıb, təklif və rəylərini dinləyib.

Ardından Azərbaycan premyer-liqasında 2025/26-cı illər mövsümünün formatı müzakirə edilib. Qərara alınıb ki, növbəti mövsüm 12 komandanın iştirakı ilə 3 dövrədən (33 turdan) ibarət olsun. 3-cü dövrənin oyunlarında meydan sahibi olacaq komandalar püşk əsasında müəyyənləşdiriləcək. Cari mövsüm Əsasnaməyə uyğun olaraq, sonuncu yeri tutan komanda premyer-liqanı tərk edəcək, əvəzində 1-ci liqadan 3 komanda birbaşa yüksək dəstəyə vəsiqə qazanacaq.

2024/25-ci illər mövsümündə 1-ci liqada sonuncu yeri tutmuş klub 2-ci liqaya düşəcək, 2-ci liqadan isə ilk 3 yeri tutmuş komanda birbaşa 1-ci liqaya yüksələcək. 1-ci liqada 9-cu yeri və 2-ci liqada 4-cü yeri tutan komandalar arasında neytral meydanda bir oyundan ibarət pley-off matçı keçiriləcək. Qalib komanda 1-ci liqada mübarizə aparmaq hüququ qazanacaq.

Qeyd edək ki, cari mövsümün sonunda 1-ci liqadan premyer-liqaya 3 komanda yüksələcəyindən, belə sistem tətbiq olunacaq.

İcraiyyə Komitəsində qərara alınıb ki, 2025/26-cı illər mövsümündə premyer-liqada sonuncu yeri tutan klub 1-ci liqaya düşsün, 1-ci liqanın qalibi isə birbaşa yüksək dəstəyə vəsiqə qazansın. Premyer-liqada 11-ci yeri və 1-ci liqada 2-ci yeri tutan komandalar arasında neytral meydanda bir oyundan ibarət pley-off görüşü keçiriləcək. Qalib komanda premyer-liqada iştirak hüququ əldə edəcək.

2025/26-cı illər mövsümündə 1-ci liqada sonuncu yeri tutan komanda 2-ci liqaya düşəcək, 2-ci liqada birinci yeri tutan komanda birbaşa 1-ci liqaya yüksələcək. 1-ci liqada 9-cu yeri tutan komanda 2-ci liqada 2-ci yeri tutan kollektivlə neytral meydanda bir oyundan ibarət pley-off oyunu keçirəcək.