Ukrayna ilə razılaşma
Tramp çıxışında qeyd edib ki, Zelenskidən Ukraynanın ABŞ ilə nadir metallar və təhlükəsizlik sahəsində razılaşma imzalamağa hazır olduğunu bildirən məktub alıb:
"Bu günlərdə məktubu aldım. O bildirir ki, Ukrayna sizin üçün uyğun olan istənilən vaxt sazişi imzalamağa hazırdır."
Ukrayna böhranının həlli
Tramp vurğulayıb ki, ABŞ Rusiya ilə aparılan danışıqlarda Moskvanın Ukrayna böhranının dinc yolla həllinə razılıq verməyə meyilli olduğuna dair siqnallar alıb. O əlavə edib ki, Zelenski məktubunda "Trampın güclü liderliyi altında davamlı sülhə nail olmaq üçün işləməyə hazır olduqlarını" bildirib.
Bununla yanaşı, Tramp Ukraynaya yardımla bağlı sələfi Co Baydeni sərt tənqid edərək deyib:
"Biz bəlkə də 350 milyard dollar xərcləmişik. Sanki uşaqdan konfet almaq qədər asan olub. Bax, belə oldu."
Yeni raketdən müdafiə qalxanı
ABŞ Prezidenti ölkənin yeni nəsil raketdən müdafiə sistemi yaratmaq niyyətində olduğunu açıqlayıb:
"Ali baş komandan kimi diqqətim gələcəyin ən güclü ordusunu qurmaqdır. İlk addım olaraq Konqresdən ABŞ-də istehsal ediləcək "Qızıl Qübbə" (Golden Dome) raketdən müdafiə qalxanının maliyyələşdirilməsini istəyirəm."
Gömrük tarifləri
Tramp ABŞ-nin 2 aprel tarixindən etibarən idxal olunan mallara yeni qarşılıqlı tariflər tətbiq edəcəyini bildirib:
"Digər ölkələr onilliklər boyu bizə qarşı tariflərdən istifadə ediblər. İndi bizim vaxtımız çatıb. Avropa İttifaqı, Çin, Braziliya, Hindistan, Meksika və Kanada - bunlardan xəbəriniz var? Onlar bizə çox yüksək tariflər tətbiq edirlər, bu, ədalətsizlikdir."
Panama kanalı və Qrenlandiya məsələsi
ABŞ Prezidenti Panama kanalının "geri qaytarılması" niyyətində olduğunu açıqlayıb və bu məsələyə Dövlət katibi Marko Rubionun məsul olacağını bildirib.
Tramp həmçinin qeyd edib ki, Qrenlandiyanın ABŞ-ə qoşulması ideyasını alqışlayır və vurğulayıb ki, Vaşinqton üçün Qrenlandiya "milli və beynəlxalq təhlükəsizlik baxımından vacibdir."
ABŞ-nin uyğunsuz xərcləri
ABŞ lideri ölkənin xarici layihələrə ayırdığı bəzi büdcə vəsaitlərini sərt tənqid edib:
"Biz Moldovada sol təbliğatına 32 milyon dollar ayırmışıq. Dövlət Effektivliyi Departamenti (DOGE) 10 milyon dolların Mozambikdə kişi sünnətinə, 20 milyon dolların Yaxın Şərqdə ərəb 'Simaqili Küçə' layihəsinə, 8 milyon dolların isə siçanları transgenderə çevirmək üzrə tədqiqatlara xərcləndiyini aşkar edib."
Daxili siyasət
Tramp bildirib ki, federal hökumətin özbaşınalığına son qoyub və Bayden administrasiyasının "radikal solçular" tərəfindən sabotaj edilən ədalət sistemini bərpa etmək üçün qətiyyətli addımlar atıb.
Bundan əlavə, ABŞ-də vergilərin əhəmiyyətli dərəcədə azaldılacağını elan edib:
"Amerikalılara inflyasiya ilə mübarizədə təcili kömək üçün əlavə maaşdan, sosial təminat ödənişlərindən və çay pulundan vergi tutulmamalıdır."
Miqrant siyasəti
Tramp ölkəni "qanunsuz miqrantlardan azad etmək" üçün tədbirlər gördüyünü bildirib. O əlavə edib ki, ABŞ-nin "bütün şəhərləri miqrant axını və görünməmiş korrupsiya nəticəsində çökür."
