İtaliyanın baş naziri Giorgia Meloni hesab edir ki, NATO müqaviləsinin alyansın “bir və ya bir neçə” üzv ölkəyə silahlı hücum zamanı kollektiv cavab tədbirləri nəzərdə tutan 5-ci maddəsinin Ukraynaya tətbiq edilməsi Kiyevin təşkilata daxil olmasına alternativ ola bilər. AFN.az xarici mediaya istinadən xəbər verir ki, siyasətçinin Aİ-nin fövqəladə sammitindən sonra keçirilən mətbuat konfransında verdiyi açıqlamada bu ehtimalın müzakirə olunduğunu bildirib."Düşünürəm ki, NATO-nun 5-ci maddəsinin Ukraynaya tətbiqi daha effektiv olardı. Bu, NATO-ya daxil olmaqdan fərqlidir, lakin bu, üzv dövlətlərin istifadə etdiyi eyni zəmanətlərin Ukraynaya da verilməsi demək olardı. Bu, digər təkliflərdən daha səmərəli, sabit, uzunmüddətli təminat olar. Və biz bunu müzakirə edirik", - deyə Meloni bildirib. O, Kiyev üçün real təhlükəsizlik təminatlarının yalnız Şimali Atlantika Alyansı kontekstində verilə biləcəyinə əminliyini bir daha təkrarlayıb.
