“Reuters” mənbələrə istinadən yazır ki, Birləşmiş Ştatlar Ukraynaya uzaqmənzilli GLSDB raketlərinin tədarükünü bərpa etməyi planlaşdırır. Agentliyin iki mənbəsi bildirib ki, döyüş sursatları Rusiyanın GPS tıxanma sistemlərinə daha davamlı olmaq üçün təkmilləşdirilib.
Agentlik qeyd edir ki, GLSDB mərmiləri əvvəllər elektron müharibəyə qarşı zəif olduğuna görə aşağı effektivlik nümayiş etdirib. Bununla belə, mənbələrə görə, son həftələrdə 19 təkmilləşdirilmiş bomba uğurla sınaqdan keçirilib.
Mənbələrin bildirdiyinə görə, GLSDB-nin Ukraynaya çatdırılması yaxın günlərdə başlaya bilər, çünki Avropada artıq belə mərmi ehtiyatları var. “Reuters” agentliyinin məlumatına görə, tədarük ehtiyacı Ukraynanın ABŞ-ın ona verdiyi bütün uzaqmənzilli ATACMS raketlərini istifadə etməsi səbəbindən yaranıb. GLSDB “Boeing” (ABŞ) və “Saab” (İsveç) tərəfindən hazırlanmış mərmidir. Məhv etmə məsafəsi 150 km-ə qədərdir. Bu, raket mühərrikli yüksək dəqiqlikli 113 kiloqramlıq bombadır. M270 MLRS və HIMARS kimi yerüstü işəsalma qurğularından buraxılır.
“Boeing” ABŞ administrasiyasına şirkətdən GLSDB raketlərini almağı və onları 2022-ci ilin payızında Ukraynaya çatdırmağı təklif edib. 2023-cü ilin martında Rusiya Müdafiə Nazirliyi Rusiyanın hava hücumundan müdafiə sistemlərinin ilk dəfə olaraq Ukrayna silahlı qüvvələri tərəfindən idarə olunan GLSDB-ni vurduğunu elan etdi. ABŞ rəsmiləri bunu təsdiqləməyib.
11 mart 2025-ci ildə aparılan danışıqlardan sonra Birləşmiş Ştatlar yardım çatdırılmasını və kəşfiyyat məlumatlarının mübadiləsini bərpa edib. ABŞ-ın Milli Təhlükəsizlik müşaviri Mayk Uolz deyib ki, qərar “dərhal qüvvəyə minir”.
//Samir Qurbanov, Editor.az
