Tomas Müller uşaqlıq arzusunu yerinə yetirmək istəyir

“Bayern”in hücumçusu Tomas Müller Çempionlar Liqasının yarımfinalında “Real”a qarşı keçirəcəkləri cavab oyunu haqda danışıb.

Arena.az veteran alman futbolçunun bu barədə fikirlərini təqdim edir:

“Cavab oyununda vəziyyət aydındır. Qalib davam edir. Beləliklə, oyun final xüsusiyyəti alıb. Çərşənbə günü bizim uşaqlıq arzumuzu yerinə yetirmək və Çempionlar Liqasının finalına çıxmaq imkanımız var. Bunun üçün hər şeyi verəcəyik”, deyə Müller vurğulayıb.

Xatırladaq ki, komandalar arasında Münhendə keçirilmiş ilk oyunda 2:2 hesablı məhsuldar heç-heçə qeydə alınıb.

Cavab oyunu bu gün Madridin “Santyaqo Bernabeu” stadionunda keçiriləcək. Oyuna Bakı vaxtı ilə saat 23:00-da start veriləcək.

Tomas Müller “Bayern”in yetirməsidir. Veteran hücumçu 2000-ci ildən “Bayern”in düşərgəsindədir və 2009-cu ilin iyulundan Münhen klubunun əsas komandasında çıxış edir. Müllerin “Bayern”lə müqaviləsi 2025-ci ilin iyun ayının sonuna qədər qüvvədədir.

Cari mövsümdə veteran hücumçu “Bayern”in heyətində bütün yarışlarda 38 oyun keçirib, 7 qol vurub, 10 məhsuldar ötürmə verib.

Ümumilikdə Müllerin “Bayern”in heyətində çıxışının mənzərəsi belədir: 704 oyun, 242 qol, 266 məhsuldar ötürmə.

Müllerin zəngin qənimətlər muzeyi var. Tomas “Bayern”lə 12 dəfə Bundesliqanın, 6 dəfə Almaniya Kubokunun, 8 dəfə Almaniya Super Kubokunun, 2 dəfə Çempionlar Liqasının, 2 dəfə UEFA Super Kubokunun, 2 dəfə FIFA Klub Dünya Kubokunun qalibi olub. Müller həmçinin 2 dəfə Almaniya Kubokunun (2009/2010 – 4 qol, 2013/2014 – 8 qol) ən sərrast futbolçusu olub.

Tomas Müller 2010-cu ilin martında debüt etdiyi Almaniya yığmasının heyətində 128 oyuna çıxıb, 45 qol vurub, 40 məhsuldar ötürmə verib. Müller “bundestim”lə 2014-cü ildə Braziliyada keçirilmiş dünya çempionatının qalibi olub. Hücumçu həmçinin 5 qolla DÇ-2010-nun ən sərrast futbolçuları arasında yer alıb.

“Transfermarkt” internet-portalı 34 yaşlı veteran hücumçunun transfer dəyərini 10 milyon avro məbləğində qiymətləndirir.