Suriyanın Hələb vilayətinə bağlı Mənbic rayonunda minalanmış avtomobillə təşkil edilən terror hücumunda ilk məlumatlara görə 14 mülki şəxs həlak olub, 15 nəfər yaralanıb.
"Azadlıq şəfəqi" əməliyyatı çərçivəsində separatçı terror təşkilatı PKK/YPG-dən təmizlənən Mənbicin cənub girişində avtomobilə yerləşdirilən bomba partladılıb. Terror aktı nəticəsində ilk müəyyən edilən məlumatlara əsasən 14 mülki şəxs həyatını itirib, 15 nəfər xəsarət alıb. Yaralılar ətrafdakı xəstəxanalara aparılıb, ölənlərin sayının artacağından narahatlıq ifadə olunur.
Hücumun məsuliyyətini hələ heç bir qrup üzərinə götürməsə də, yerli təhlükəsizlik qüvvələri aktın PKK/YPG tərəfindən törədildiyi ehtimalını nəzərdən keçirir.
SMO qüvvələri "Azadlıq şəfəqi" əməliyyatı çərçivəsində 9 dekabr 2024-cü ildə Mənbici terrorçulardan azad etmişdi.
