Bazar günü ABŞ prezidenti Donald Trampın polad və alüminiumun bütün idxalına 25%-lik rüsum tətbiq edəcəyinə dair açıqlaması fonunda dollar major valyutalar qarşısında öz mövqelərini demək olar ki, qoruyub saxlaya bilib. Hazırda EUR/USD cütlüyü 1.0305 səviyyəsində, GBP/USD cütlüyü isə 1.2360 səviyyəsində ticarət olunur.
Tramp, həmçinin, yaxın iki gün ərzində Amerika mallarına rüsum tətbiq edən ABŞ-ın ticarət tərəfdaşlarına qarşı tariflərin tətbiq olunacağını bildirib. Dolların təzyiq altında qalması qızılın qiymətinin artmasına dəstək olur. Dəyərli metal ötən gün 2942$ səviyyəsinə qədər yüksələrək tarixi maksimum həddini bir daha yenilədi. Hazırda qızıl bir qədər ucuzlaşaraq 2919$-a ticarət olunur.
Cari həftənin əvvəlindən neftin qiyməti bahalaşmağa davam edir. “Brent” markalı neftin bir barrel üçün qiyməti 76.95$-a qədər bahalaşıb. Ekspertlərin fikrincə, Trampın siyasəti Rusiya və İrana qarşı sanksiyaların genişləndirilməsi proqnozları fonunda nefti dəstəkləyir.
Bugün Bakı vaxtı ilə saat 19:00-da ABŞ Federal Ehtiyatlar Sisteminin sədri Cerom Pavelin çıxışı bazar iştirakçılarının diqqət mərkəzində olacaq əsas xəbərdir. Həmçinin, gün ərzində İngiltərə Bankının (BoE) sədri Beylinin çıxışı da baş tutacaq. Türkiyədə isə Pərakəndə Satış Dövriyyəsinin Həcmi göstəriciləri dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
