Ermənistan hakimiyyətində təmsil olunanların bir-birinə zidd bəyənatlar verməsi, özlərini təkzib edən fikirlər səsləndirməsi adi hal halıb. Dünən dediklərini bu gün dananlar siyasətdən uzaq olduqalarını bir daha nümayiş etdirirlər. Baş nazir Nikol Paşinyanın şou xarakterli çıxışları, daxili auditoriyaya hesablanan bəyanatları cəmi bir neçə saatdan sonra məsxərəyə qoyulur. Onun komandasında təmsil olunanlar da eynən Paşinyanın kursunu davam etdirir, bəzən özlərinin danışdıqlarının fərqində olmurlar.
Ermənistan parlamentinin sədri Alen Simonyan da tez-tez bir-birinə zidd, hətta fikirlərini inkar edən çoxlu sayda bəyanatların müəllifidir. Bəzən onun “istedadı” qarşısında aciz qalan jurnalistlər Simonyanın təzadlı fikirləri qarşısında xeyli düşünməli olurlar.
Erməni spiker yenə “quş” buraxıb. Qarabağın Azərbaycanın bir hissəsi kimi tanınmasına toxunan Simonyan bildirib ki, bunun ilk təşəbbüskarı Rusiya prezidenti Vladimir Putindir. Putin isə Paşinyanın məlum bəyanatından sonra “şoka” düşdüyünü bildirmişdi. Rusiya prezidenti Paşinyanın Qarabağı Azərbaycanın bir hissəsi kimi tanımasına hətta hiddətini də gizlətmir. O, dəfələrlə bildirib ki, bu bəyanatla Rusiyanın Qarabağla bağlı planın üstündən xətt çəkilib. Simonyan bildirib ki, Rusiya bizi tək buraxdı. Məsələ isə çox sadədir. Ermənistanda hesab edirdilər ki, Rusiya Qarabağda Azərbaycanla müharibəyə başlayacaq və 1992-1994-cü illərdə olduğu kimi yenə erməni əsgərinin formasında Azərbaycan ərazilərini işğal edəcək. Amma Azərbaycan 1990-cı illərdə olduğu kimi zəif deyil və ölkəmizin hərbi gücünü region ölkələri də yaxşı bilir.
Üstəlik, Qarabağın Azərbaycan ərazisi kimi tanınmasına Putinin təşəbbüs göstərməsi kökündən yanılış yanaşmadır. Simonyan və digər erməni siyasətçilər çox gözəl anlayırlar ki, bütün ölkələr Qarabağı Azərbaycan ərazisi kimi rəsmən tanıyıb. Hətta, Fransa Senatı Qarabağın “müstəqilliyini” tanıyan biabırçı qətnamə qəbul etdikdən sonra, rəsmi Paris Fransanın Azərbaycanın ərazi bütövlüyünü qəbul etməsi ilə bağlı bəyanat yaydı.
Simonyan əlbəttə ki, bütün bunlardan xəbərdardır. Eləcə də ölkəmizin və Ermənistanın BMT-yə sovet sərhədləri daxilində girməsini də çox gözəl bilir. Bundan başqa, BMT Təhlükəsizlik Şurasının dörd qətnaməsi də Simonyanın yadından çıxmamalıdır. Ermənistanın işğal etdiyi ərazilərdə Azərbaycanın suveren hüquqlarını ermənilərdən başqa heç kim şübhə altına almayıb. Ermənistanın baş naziri Nikol Paşinyan dəfələrlə özünün “Facebook” səhifəsində də bu barədə yazıb: “1994-cü ildən başlayaraq Qarabağın Azərbaycana qaytarılması ətrafında danışıqlar prosesi aparılıb. Bütün danışıqlarda Qarabağın Azərbaycana qaytarılması müzakirə olunub. Biz bunu etmədik. Beynəlxalq birlik isə hətta müharibəyə qarşı çıxmadı. Bu, reallıqdır, əziz insanlar”.
Belə çıxır ki, Simonyan Paşinyanı və eyni zamanda beynəlxalq hüququ rədd edir. Bu gün Ermənistanın Rusiyaya qarşı çoxlu iddiaları var. Amma Rusiyanı Qarabağın Azərbaycanın bir hissəsi kimi tanımasında ittiham etmək axmaqlıqdır. Alen Simonyan erməni jurnalistlərə Qarabağı “Artsax” adlandıra bilməyəcəyini deyib. Qeyd edib ki, siyasi xadim kimi qonşu ölkənin ərazisinə başqa ad demək onun siyasi imicinə xələl gətirər. Yenə də təzad, yenə ziddiyət. Bir neçə il əvvəl Nikol Paşinyan Xankəndidə, “Qarabağ Ermənistandır və nöqtə”, deyən zaman onu alqışlayanlar arasında Simonyan da olub. Üstəlik, Simonyan əlində nar tutaraq “Ağdam mənim vətənimdir”, deyəndə anlamalıydı ki, başqa ölkənin ərazisində onun suveren hüquqlarına hörmətsizlik edir?
Simonyan və daxil olduğu komandanın başı əzilməyincə elə güman edirdilər ki, Qarabağ doğurudan da Ermənistandır və onlar Azərbaycanı başqa ərazilərini də işğal etməklə hədələyirdilər. Simonyan Rusiyanın Ermənistanı “tərk etməsindən” şikayətlənir və bildirir ki, Moskva erməniləri tək buraxdı. Amma Putin bəyanatlarında da təsdiq edib ki, Rusiya Ermənistana daim silah verib. Hətta 44 günlük müharibə zamanı da Moskva Ermənistanın yanında olub. Onu mütəmadi silah-sursatla təmin edib. Yeri gəlmişkən, bunu dolayısı ilə Simonyan özü də etiraf edib: “Qarabağ ermənilərinin əllərində olan silahlarla döyüşmək imkanı var idi”. Bəs Qarabağdakı separatçılar silahları haradan alıblar? Ermənistanın silah zavodu var? Deməli, Qarabağa bütün silahlar Rusiyadan daşınıb. Eyni zamanda, Simonyan iki vacib məqamı etiraf edib. Birincisi, o, Ermənistanın Azərbaycanın müvəqqəti işğal olunmuş ərazilərində separatçıları silahlandırdıqlarını boynuna alıb. İkincisi, Qarabağda antiterror əməliyyatı keçirməkdə Azərbaycanın haqlı olduğunu sübut edib. Bununla da Ermənistan hakimiyyətinin qeyri səmimiliyi bir daha sübut olunub. Qarabağı Azərbaycanın tərkibində tanıyan rəsmi İrəvan, bəzən çaşdırıcı bəyanatları ilə özünü də çərin vəziyyətə salır. Siyasi imitasiyalardan əl çəkməyin vaxtı isə 4 il əvvəl başa çatıb. İndi regionda güclü Azərbaycan var və onun şərtləri ilə hesablaşmaq lazımdır.
Vəli Həsənoğlu,
KONKRET.az
