Bakıda təlim-məşq toplanışında olan 17 yaşadək futbolçulardan ibarət Azərbaycan milli komandası (U-17) yoxlama oyunu keçirib.
Arena.az xəbər verir ki, millimiz “Qarabağ” klubunun müvafiq yaş qrupundan ibarət komandası ilə qarşılaşıb.
Oyun milli komandanın 3:0 hesablı qələbəsi ilə yekunlaşıb. Qolları 67-ci dəqiqədə Emil Usubov, 70-ci dəqiqədə Emil Həsənov və 85-ci dəqiqədə Əhməd Vəliyev vurublar.
Xatırladaq ki, U-17 millimiz fevralın 14-dən 22-nə qədər Belarusun paytaxtı Minskdə gənclər arasında İnkişaf Kuboku turnirində iştirak edəcək.
