ABŞ prezidenti Donald Tramp yeni ticarət nazirinin andiçmə mərasimi zamanı deyib ki, Vladimir Putin və Vladimir Zelenski Ukraynada müharibəyə son qoymaq üçün birlikdə çalışmalıdırlar.
Vaşinqtonda keçirilən mərasimdə Tramp qeyd edib ki, Rusiya sazişin imzalanmasında maraqlıdır və Vaşinqtonla Moskva arasında danışıqlar fevralın 25-də Səudiyyə Ərəbistanında başlayacaq.
"Düşünürəm ki, prezident Putin və prezident Zelenski görüşməlidirlər. Çünki bilirsiniz, nə var? Biz milyonlarla insanın öldürülməsini dayandırmaq istəyirik".
Tramp, həmçinin mayın 9-da “Qələbə günü”nü qeyd etmək üçün Moskvaya səfər etmək niyyəti ilə bağlı mediada yayılan məlumatları təkzib edib.
O, həmçinin milli təhlükəsizlik müşaviri Mayk Uolzun bir neçə saat əvvəl verdiyi şərhləri təkrarlayaraq, Ukrayna ilə mineral sövdələşmənin tamamlanmaq üzrə olduğunu bildirib.
