2025-ci ilin yanvar-fevral ayları ərzində (ilk 2 ayda) Bakı Fond Birjasında (BFB) əqdlərin cəmi həcmi 13 milyard 616 milyon 922 min manat təşkil edib.
Bu barədə Marja.az Bakı Fond Birjasına istinadən xəbər verir.
Xatırladaq ki, 2024-cü ilin yanvar-fevral ayları ərzində Bakı Fond Birjasında əqdlərin cəmi həcmi 5 milyard 303 miylon 733 min manat təşkil etmişdi. Beləliklə, Birjada əqdlərin cəmi həcmi cari ilin ilk 2 ayında ötən ilin eyni dövrü ilə müqayisədə 2,6 dəfə artıb. Artım əsasən repo əməliyyatları ilə bağlıdır.
2025-ci ilin ilk 2 ayında BFB-də əməliyyatların cəmi həcminin 95%-ni və ya 12 milyard 940 milyon 827 min manatını repo əməliyyatları təşkil edib. 2024-cü ilin ilk 2 ayında Birjada əməliyyatların cəmi həcminin 65,5%-ni və ya 3 milyard 473 miylon 124 min manatını repo əməliyyatları təşkil etmişdi. Beləliklə, repo əməliyyatlarının həcmi 2025-ci ilin yanvar-fevral ayları ərzində ötən ilin eyni dövrü ilə müqayisədə 3,7 dəfə artıb.
Repo əməliyyatları xaric cəmi əməliyyatların həcmi isə 1 milyard 830 milyon 609 min manatdan (2024-cü ilin ilk 2 ayında) 676 milyon 95 min manata (bu ilin ilk 2 ayında) düşüb (2,7 dəfə azalıb).
Bakı Fond Birjası repo əməliyyatlarının həcmindəki kəskin artımı şərh edib.
"Bildiyiniz kimi, repo əməliyyatları bazarda qısamüddətli likvidliyin idarə olunması məqsədini daşıyan çevik maliyyə alətidir. 2024 cü ilin anoloji dövrü ilə müqayisədə 2025 ci ilin ilk 2 ayındakı artım dinamikası yerli kapital bazarı vasitəsilə bazar iştirakçılarının bu alətə daha çox marağının göstəricisidir",- BFB-dən Marja.az-a bildirilib.
"Səhm ticarəti üzrə dövriyyə 2.07 dəfə, korporativ qiymətli kağızlar üzrə isə 1.61 dəfə artıb"
Qeyd edilib ki, bununla yanaşı, qeyd etmək istərdik ki, ilin yeni başlamasına baxmayaraq, digər alətlərin dövriyyəsi artma trendini göstərir:
"Belə ki, yanvar-fevral aylarında səhm ticarəti üzrə dövriyyə ötən illə müqayisədə 2.07 dəfə, korporativ qiymətli kağızların ticarət dövriyyəsi isə 1.61 dəfə artmışdır.
Bakı Fond Birjası olaraq bizim əsas diqqət yetirdiyimiz məqamlar bazarın uzunmüddətli dayanıqlılığına və inkişafına yönəlməkdir. Bu istiqamətdə də 2025-2026-cı illər üzrə strateji hədəflərimiz üçün bir sıra yenilik və addımlar atmağı planlayırıq".
