Müasir dünyada iş və şəxsi həyat arasında balans yaratmaq bir qədər çətin məsələdir desək, yanılmarıq. Hətta bəzi insanlar müxtəlif səbəblərə görə iki işdə çalışırlar. Bu da onların iş və şəxsi həyat arasındakı balansı pozur. İnsanların iş mühitində ən çox şikayətləndiyi nüanslardan biri də “ işdən özümə vaxt ayıra bilmirəm” düşüncəsidir. Nə edək ki, işlə şəxsi həyatımız arasındakı balansı qoruyaq?
Valyuta.az işlə şəxsi həyatı balanslaşdırmağın yollarını sizin üçün araşdırdı.
İş və şəxsi həyatı balanslaşdırmaq üçün vaxtı düzgün idarə etmək vacibdir. Nəzərə almalıyıq ki, hər şey eyni anda vacib deyil, hansı tapşırıqların daha önəmli olduğuna nəzər salmaq daha effektiv ola bilər. Vaxtı idarə etmək üçün gündəlik və həftəlik planlar qurmaq iş və şəxsi həyat arasında vaxtı bölməyə yardım edir. Yəqin ki, “pomodoro” texnikasını eşitmisiniz. Bu texnika vasitəsi ilə 25 dəqiqə işə fokuslanıb, 5 dəqiqə fasilə edərək daha effektiv çalışmış olacaqsınız. Başqa bir metod isə “eisenhower matrisi" istifadə etməkdir. Təcili və vacib tapşırıqları ayırd etmək üçün bu metodu tətbiq etmək olar.
İş və şəxsi həyatı balanslaşdırmağın bir digər yolu sərhədlər təyin etməkdir. Bunun üçün iş və ev zonanızı ayırın. Məsələn, bəzi insanlar işdən sonra iş mesajlarını cavablandırmayaraq, şəxsi vaxtını qurban verməmək üçün “xeyr” deməyi öyrənərək bu metoddan istifadə edir. Təbii ki, bunları etməyin sizi yorub-yormamasına baxa bilərsiniz.
Bir çoxlarımız nə işdən əvvəl, nə də sonra idmanla məşğul olmuruq. Amma həm işin, həm də günün stresindən uzaq olmaq üçün enerji artıracaq bir digər seçim idman etməkdir. Bundan əlavə iş və şəxsi həyatda balans tarazlığında sağlam qidalanma, yetərli yuxu da önəmli rol oynayır. Sağlam qidalanma yorğunluğu azaldır və məhsuldarlığı artırır, yuxu keyfiyyəti isə iş performansını və şəxsi həyat keyfiyyətini yaxşılaşdırır.
İş və şəxsi həyat arasında balans yaratmaq üçün yalnız vaxtı düzgün idarə etmək kifayət deyil. Stressi idarə etmək və psixoloji sağlamlığa diqqət yetirmək də eyni dərəcədə vacibdir. Stresi idarə etmək üçün meditasiya və nəfəs texnikalarından istifadə etmək olar. Belə ki, gündə cəmi 5-10 dəqiqə sakit bir mühitdə nəfəs məşqləri etmək stressi azaldacaq və iş məhsuldarlığına müsbət təsir edəcək. İşdə stresi azaltmaq üçün isə hər 90 dəqiqədən bir qısa fasilə vermək daha məhsuldar işləməyə kömək edəcək. Çünki uzun saatlarla fasiləsiz işləmək beynin yorulmasına səbəb olur. Onu da qeyd edək ki, işdən birbaşa evə getmək yerinə açıq havada vaxt keçirmək, gəzintiyə çıxmaq və ya parkda oturmaq beyninizi dincəldərək daha müsbət düşünməyə kömək edəcək.
Aydındır ki, insanın işdəki məhsuldarlığını azaldan vasitələrdən biri də özünə vaxt ayıra bilməməsidir. Elə ona görə də, şəxsi həyat və sosial münasibətlərə vaxt ayırmaq sizi emosional cəhətdən daha güclü edəcək. Özününzü yaxşı hiss etdikdə həm işdə, həm də şəxsi həyatınızda daha aktiv olacaqsınız. Ancaq iş mühitində olmaq, yaxud da ancaq özününüzə vaxt ayırmaq yerinə balansı qorumaq peşəkar uğur qazanmağa, həm də şəxsi həyatınızı dəyərləndirməyə imkan yaradacaq.
Nəticədə daha sağlam, xoşbəxt və məhsuldar bir həyat tərziniz olacaq. Ona görə də nə ancaq iş mühitində qalmaq , nə də ancaq özünüzə vaxt ayırmaq yerinə balansı doğru şəkildə tərtib etməyə çalışa bilərsiniz.
Sərvanə Rəmixanova
