Rusiyanın Ukraynadakı qaz və enerji obyektlərinə kütləvi raket hücumu NATO təyyarələrinin Polşada havaya qalxmasına səbəb olub.
Reyting.az xəbər verir ki, bu, Rusiyanın Ukraynanın qaz və enerji infrastrukturuna iri raket və pilotsuz təyyarə zərbələri endirməsi barədə məlumat yayıldıqdan sonra ortaya çıxıb.
“British Express” xəbər verir ki, Rusiya Ukrayna mülki sakinlərinə dağıdıcı hücumlar həyata keçirmək üçün Tu-95MS strateji bombardmançılarını Arktika aerodromundan qaldırıb.
Məlumata görə, hücum Donald Trampın Kreml liderinin müharibəni dayandırmaq istədiyini və Vladimir Putinin “başqa seçimi olmadığının” gizli səbəbini yalnız ABŞ prezidentinin bildiyini deməsindən bir neçə saat sonra baş verib.
Ukrayna mənbələrinin məlumatına görə, gəmidən buraxılan onlarla “Kalibr” raketi və strateji bombardmançı təyyarələrdən atılan “Kh-101” raketlərindən istifadə edilib.
Ternopildə raket hücumundan sonra qaz kəməri partlayıb və nəhəng alov gecə səmasını işıqlandırıb. Raketlər Poltava və Sumi vilayətlərindəki qaz anbarlarına da düşüb. Bu ərazilərdə çoxsaylı partlayışlar qeydə alınıb. İvano-Frankivsk və Vinnitsa da hücuma məruz qalıb.
Ukraynanın ikinci ən böyük şəhəri və ənənəvi olaraq rusdillilərin çoxluq təşkil etdiyi Xarkovda “kritik infrastruktur” “İsgəndər-M” raket zərbəsi ilə hədəfə alınıb. Doqquz çoxmərtəbəli yaşayış binası və 36 fərdi mülkə ziyan dəyib, onların istilik sistemləri sıradan çıxıb.
“Rusiya Federasiyasının uzaqmənzilli aviasiyasının Qərbi Ukraynadakı hədəflərə zərbələr endirməsi ilə əlaqədar Polşa və müttəfiqlərin hərbi hava qüvvələri hava məkanımızda hərəkətə keçib”, - Silahlı Qüvvələrin Varşavadakı Əməliyyat Komandanlığı bildirib.
Bəyanatda deyilir ki, NATO-nun regional silahlı qüvvələrinin əməliyyatları komandanı sərəncamında olan bütün qüvvə və resursları səfərbər edib: “İkili təyinatlı döyüş təyyarələri buraxılıb, yerüstü hava hücumundan müdafiə və radar kəşfiyyat sistemləri ən yüksək hazırlıq səviyyəsinə gətirilib. Görülən tədbirlər təhlükə altında olan ərazilərlə həmsərhəd torpaqların təhlükəsizliyinin təmin edilməsinə yönəlib”.
ELÇİN
