Xəbər verdiyimiz kimi, Azərbaycanın Yunanıstandakı Səfirliyinin birinci katibi vəzifəsində işləmiş Rəhman Şahhüseynli Sumqayıt Şəhər Polis İdarəsinin 3-cü Polis Şöbəsinin əməkdaşları tərəfindən saxlanılaraq məsuliyyətə cəlb olunub.
Sumqayıt Şəhər Məhkəməsində Rəhman Şahhüseynli barəsində xırda xuliqanlıqla bağlı bəraət verilib, digər iki əmələ görə isə 500 manat cərimə edilib və məhkəmə zalından azadlığa buraxılıb.
R.Şahhüseynli baş verənlərlə bağlı “Qafqazinfo”ya müraciət edib. Bildirib ki, bütün bunlar illərdir onunla yaşayan və ciddi səbəblərdən dolayı qarşı tərəfə getməkdən qətiyyətlə imtina edən bir uşağa görədir:
Məsələnin mahiyyəti ailə-məişət və uşaq mövzusu olduğu üçün detallara girmək istəmirəm. Media nümayəndələrini də bu tip xəbərlərə həssas yanaşmağa, paylaşmamağa çağırıram. Qısaca deyim ki, keçmiş qohumlarım müxtəlif yollarla mənə təzyiq edərək, hazırda davam edən məhkəmələrdə üstünlük əldə etmək istəyirlər. Vaxtilə uşağa qarşı qanunsuz və amansız əməllər törətmiş Sumqayıt İcra idarəsinin bəzi məmurları da keçmiş qohumlarımla eyni cəbhədə mənə qarşı “vuruşduqlarına” görə məsələ çox eybəcər forma almaqdadır. Şikayətim əsasında həmin məmurlardan bəziləri artıq işdən uzaqlaşdırılıb, bəziləri tənbeh olunub.
Səlahiyyətindən sui-istifadə edərək qisas zəminində mənə və uşağa qarşı qərəzli və qanunsuz əməllər törədən icra məmurları ilə bağlı 10 gün əvvəl ədliyyə nazirinin müavini Mübariz Əhmədovun vətəndaş qəbulunda oldum. Orada məsələni sənəd və sübutlarla diqqətə çatdırmışam. Mənə verilən məlumata görə, həmin məmurlar barədə artıq xidməti araşdırma başlanıb”.
Qeyd edək ki, keçmiş diplomatın Yunanıstandakı səfirimiz tərəfindən döyülməsi ilə bağlı iddialar yayılmışdı. XİN-in açıqlamasında isə yayılan məlumatlar əsasında araşdırma aparıldığı və həqiqətə uyğun olmadığı bildirilmişdi.
Rəhman Şahhüseynli 2024-cü ilin sentyabrında geri çağırılıb və “diplomatik xidmət orqanlarının əməkdaşına uyğun olmayan əməllər törətdiyi” üçün diplomatik fəaliyyətinə xitam verilib.
