1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Türkiyənin Adana şəhərində ticarət mərkəzindən qızıl və pul oğurlayan kişi 3 gün ərzində havalandırma sisteminin kanalında gizlənib.
Bu barədə Oxu.Az "Hürriyet" nəşrinə istinadən xəbər verir.
Məlumata görə, ticarət mərkəzindəki zərgərlik mağazasına oğru girdiyi və zərgərdən 3 kiloqram qızıl və 100 min Türkiyə lirəsi (təxminən 4800 manat) oğurladığı iddia edilib.
Fevralın 2-də gecə saatlarında oğrunun tutulması üçün əməliyyat keçirilib. Lakin polis, Fövqəladə Halların İdarə Olunması Agentliyi (AFAD) və özəl təhlükəsizlik işçilərinin apardığı əməliyyat-axtarış tədbirləri nəticə verməyib, şübhəli tapılmayıb.
Ticarət mərkəzinin havalandırma kanalında gizlənən şübhəli orada yerləşdirilən təhlükəsizlik kamerasına düşsə də, dərhal yerini dəyişib. Üç gündən sonra o, nəhayət, binadan kənara çıxıb və qaçmağa çalışıb, lakin saxlanılıb. Ərazidə araşdırma aparan polis şübhəlinin oğurladığı iddia edilən qızıl və pulları isə tapmayıb.
Eyni zamanda, mağazasından oğurluq olunduğunu iddia edən zərgərlik firması şikayətini geri götürüb.
Şübhəlinin bu 3 gün ərzində susuz və qidasız qaldığı, zibil qutularındakı yeməklərlə qidalandığı məlum olub və xəstəxanaya yerləşdirilib. Müalicəsi tamamlandıqdan sonra polis bölməsinə aparılıb.
Həmçinin şübhəlinin geyiminin üzərində ingiliscə "Done" ("bitdi, tamamlandı") sözünün yazılması diqqət çəkib. Şübhəlinin polis bölməsində dindirilməsi davam edir.
