"Qarabağ"a qarşı layiqli mübarizə apardıq" - "Səbail"in məşqçisi

"Səbail" ölkə kubokunun 1/4 final mərhələsinin ilk oyununda evdə "Qarabağ"a uduzdu - 0:1.

"Football-plus.az" xəbər verir ki, "dənizçilər"in məşqçisi Elvin Məmmədov (baş məşqçi Cavid Hüseynov cəzalıdı - red.) oyunsonrası mətbuat konfransında jurnalistlərin suallarını cavabladı.

- Komandamı xüsusilə ikinci hissədə apardığı mübarizəyə görə təbrik edirəm. Çünki "Qarabağ" həm avrokuboklarda, həm də ölkə çempionatında sözünü demiş komandadı. Yaxşı oyun keçirdik. Dörd gündən sonra premyer-liqa matçımız var. Bu məğlubiyyəti unudub növbəti qarşılaşmaya hazırlaşacağıq.

- "Qarabağ"a qarşı çox yaxşı mübarizə apardız. Ümumiyyətlə, "Səbail" mövsümün ikinci yarısında çox yaxşı oyun sərgiləyir. Daha da irəli getmək üçün komandada nə çatmır?
- Bəli, oyundan-oyuna daha yaxşısını edirik. Bilirik ki, komandada bəzi şeylər çatışmır. Baş məşqçimiz bunu daha yaxşı bilir. İnşallah, növbəti oyunlarda maksimum nəticələr qazanmağa çalışacağıq. Bu gün "Qarabağ"a qarşı layiqli mübarizə apardıq.

- "Qarabağ" 14 künc zərbəsi yerinə yetirsə də, bu yolla fərqlənə bilmədi. Bu epizodların üzərində xüsusi çalışmışdız?
- Bəli, məşqlərdə bu məsələlər üzərində çalışırıq.

KƏNAN BAHADIR

• Mübarizə
• Məşqçi
• Futbol
• Qarabağ
• Səbail
• Kubok
• Elvin Məmmədov