"Bu qırıcılar Ukraynanın HHQ imkanlarını genişləndirəcək və xüsusilə Rusiyanın komanda məntəqələrinə dərin zərbələr endirməyə imkan verəcək..."
Ukraynalılar işğalçılarla mübarizədə məqsədyönlü şəkildə onların komandanları və qərargahlarına zərbələr endirir.
Moderator.az xəbər verir ki, bu barədə "Forbes" nəşri yazıb.
Fransız podratçıları Ukraynaya tədarük edilmiş səsdən sürətli, təkyerli "Mirage 2000-5" qırıcılarını modifikasiya edib. İndi onlar Fransanın Ukraynaya verdiyi SCALP-EG qanadlı raketləri ilə silahlandırıla bilir.
"Forbes" analitiki David Aks yazır ki, bu qırıcılar Ukrayna Hərbi Hava Qüvvələrinin (HHQ) imkanlarını genişləndirəcək və xüsusilə Rusiyanın komanda məntəqələrinə dərin zərbələr endirmək potensialına sahib olacaq.
O, vurğulayıb ki, "Mirajlar" köhnəlmiş Ukrayna HHQ-ni modernləşdirmək çərçivəsində böyüyən F-16 donanmasını tamamlayacaq. Hazırda Ukrayna ordusunda əsasən bir neçə yüz sovet dövrünə aid döyüş təyyarəsi qalıb.
"Hərbi- hava qüvvələri bu köhnə təyyarələrin təxminən 100-nü itirib. 85 F-16 və ehtimal ki, ondan çox "Mirage 2000" modeli mövcud sovet təyyarələrini tamamlaya bilər", - Aks yazıb.
Analitik qeyd edib ki, "Mirajlar" yerüstü hədəflərə hücum tapşırıqlarını yerinə yetirə biləcək, çünki fransız mütəxəssisləri onları SCALP-EG raketlərindən başqa, Ukraynanın Fransadan aldığı "Hammer" planlaşdırıcı bombalarını da daşımaq üçün uyğunlaşdırıb.
SCALP-EG raketləri həlledici rol oynayır. Çəkisi 1,3 ton olan və 250 km uçuş məsafəsinə malik bu raketlər bunkerə nüfuz edə bilən tandem döyüş başlıqları ilə işğalçıları ən həssas yerlərində-onların qərargahlarında vurmağa qadirdir.
Bununla belə, analitik vurğulayıb ki, "Mirajlar yalnız kifayət qədər sursat olduqda effektiv olacaq". "Fransa və İtaliyadan Ukraynanın nə qədər SCALP-EG raketi aldığı bəlli deyil. Ola bilsin ki, cəmi 100 ədəd olsun.
Eyni zamanda, uzunmüddətli ağır döyüşlərdən sonra Ukraynanın nə qədər raket ehtiyatının qaldığı da bilinmir", - o, qeyd edib. Analitik əlavə edib ki, Fransa daha çox raket tədarük edəcəyinə söz verib, lakin bunun üçün müəyyən vaxt tələb olunur.
Ukrayna üçün "Mirage 2000" qırıcıları
Fevralın 6-da Ukraynanın ilk fransız "Mirage 2000" qırıcılarını aldığı məlum olub. Daha sonra Ukrayna prezidenti Vladimir Zelenski bu təyyarələrin çatdırıldığını təsdiqləyib. Onun sözlərinə görə, bu qırıcılar Ukraynanın hava hücumundan müdafiə qabiliyyətini gücləndirməlidir.
