7 fevral 2025-ci il tarixində SABAH.academy platforması çərçivəsində sayca üçüncü University Demo Day tədbiri keçirilib.
Bu tədbir tələbələrin sahibkarlıq bacarıqlarını inkişaf etdirməsi, biznes ideyalarını geniş auditoriya qarşısında təqdim etməsi və innovasiya mühitində mövqelərini gücləndirməsi üçün yaradılmış platformadır. Artıq ənənəyə çevrilən University Demo Day, gənclərin innovativ təşəbbüslərini reallaşdırmaq üçün əhəmiyyətli imkanlar yaradır.
Bu ilki tədbirdə 7 universitetdən 16 komanda iştirak edib: Bakı Dövlət Universiteti (BDU), Azərbaycan Texniki Universiteti (AzTU), Azərbaycan Dövlət İqtisad Universitetinin SABAH qrupları (UNEC SABAH), Azərbaycan Dövlət Neft və Sənaye Universitetinin SABAH qrupları (ADNSU SABAH), Bakı Ali Neft Məktəbi (BANM), Bakı Mühəndislik Universiteti (BMU) və Sumqayıt Dövlət Universiteti (SDU). İştirakçılar "Sahibkarlığa giriş" və "Dizayn yanaşması ilə sahibkarlıq və yeni biznesin inkişafı" proqramlarının məzunlarıdır. Tədbirin əsas məqsədi tələbələri real biznes mühitinə hazırlamaq, innovasiya ekosistemində aktiv iştirak etməyə təşviq etmək və onlara sahibkarlıq sahəsində dəyərli təcrübə qazandırmaqdır.
SABAH.HUB İnnovasiya Mərkəzinin çətiri altında fəaliyyət göstərən SABAH.academy, sahibkarlıq sahəsində keyfiyyətli və əlçatan təhsil təqdim etməyi hədəfləyir. İnnovasiyalar və Rəqəmsal İnkişaf Agentliyinin dəstəyi ilə akademiya VİVEKA və Orta Doğu Texniki Universiteti (ODTÜ) ilə əməkdaşlıq çərçivəsində sahibkarlıq proqramlarını genişləndirib. Bundan əlavə, Sumqayıt Dövlət Universiteti və Bakı Ali Neft Məktəbində MBA səviyyəli proqramlar həyata keçirilir. Bu günə qədər SABAH.academy-nin müxtəlif sahibkarlıq proqramlarından 2900-dən artıq tələbə yararlanıb.
Bu ilki University Demo Day gənclər üçün yalnız biznes ideyalarını təqdim etmək imkanı deyil, həm də innovasiya ekosistemindəki investorlar və ekspertlərdən dəyərli rəy və dəstək almaq şansı yaradıb. Təqdimatlar zamanı iştirakçılar layihələrinin əsas üstünlüklərini vurğulayıblar, bazar potensialını izah ediblər və münsiflər heyətinin suallarına cavab verərək startaplarının inkişaf perspektivlərini nümayiş etdiriblər.
Münsiflər heyətinin qiymətləndirməsinə əsasən üç ən yaxşı komanda qalib elan olunub:
1-ci yer: "Harmonic Hub" komandası (Bakı Dövlət Universiteti);
2-ci yer: "Rootect" komandası (Bakı Ali Neft Məktəbi);
3-cü yer: "Piezodrive" komandası (Azərbaycan Dövlət Neft Sənaye universiteti, SABAH qruplari).
Münsiflər layihələri innovativlik, bazar perspektivi və təqdimat keyfiyyətinə görə dəyərləndirib. Qalib komandalar SABAH.academy tərəfindən xüsusi mükafatlar, həmçinin "Div Academy" və "Fikir" co-working məkanından təhsil təqaüdləri qazanıblar.
University Demo Day sahibkarlığa maraq göstərən tələbələr üçün əhəmiyyətli platformaya çevrilib. Bu tədbir onların potensial investorlarla tanış olmasına, biznes ideyalarını təkmilləşdirməsinə və gələcək startaplarını inkişaf etdirməsinə real imkanlar yaradır.
SABAH.academy qarşıdakı illərdə də gənclərin sahibkarlıq sahəsində inkişafını dəstəkləməyə və ölkədə yeni biznes liderlərinin formalaşmasına töhfə verməyə davam edəcək.
Qeyd edək ki, SABAH.academy Azərbaycan Respublikası Elm və Təhsil Nazirliyinin dəstəyi ilə SABAH.HUB çətri altında yaradılmış, Azərbaycan Respublikası Təhsil İnstitutu və beynəlxalq biznes məktəbi olan IE Biznes Məktəbi ilə əməkdaşlıq çərçivəsində fəaliyyət göstərir. Akademiya sahibkarlıqla bağlı mürəkkəb bilikləri sadələşdirərək onları daha əlçatan edir. SABAH.academy platformasının fəaliyyəti ilə yaxından tanış olmaq və yeniliklərdən xəbərdar olmaq üçün www.sabahhub.com veb-saytına keçid edin.
