Azərbaycan və Rusiya arasında davam edən siyasi gərginliyə qarşılıqlı iqtisadi təhdidlər də əlavə olunub.
Bu tendensiyanı hər iki ölkənin hökumətyönlü mediasınnda görmək mümkündür.
Fevralın 11-də Azərbaycan Prezidenti İlham Əliyev Şimal-Cənub nəqliyyat dəhlizi ilə bağlı Rusiya ilə əldə edilmiş razılaşmanı təsdiqləsə də, Azərbaycan Televiziyasında, o cümlədən, Azərbaycan hakimiyyətinə yaxın mediada rəsmi Bakının Moskvaya qarşı iqtisadi sanksiya tətbiq edə biləcəyi ehtimalları müzakirə olunur.
Lakin hələlik hər iki tərəfdən də rəsmi şəkildə iqtisadi sanksiyalarla bağlı hər hansı açıqlama yoxdur.
Bəs Azərbaycanın Rusiyaya iqtisadi sanksiya tətbiq etməsi nə dərəcədə realdır? Bu addımın Azərbaycana əks-təsirləri ola bilərmi?
İqtisadçı Elçin Rəşid Azərbaycanın Ruisyaya qarşı iqtisadi sanksiya qoyacağına inanmadığın bildirib.
O hesab edir ki, bu addım Rusiyadan daha çox Azərbaycanın özünə zərər verər.
İqtisadçı fikrini iki ölkə arasındakı iqtisadi asılılığın səviyyəsi ilə əsaslandırır.
"Azərbaycan kənd təsərrüfatı məhsullarının 90 faizə qədəri Rusiyaya ixrac olunur. Eyni zamanda Azərbaycan bəzi məhsulları da Rusiyadan idxal edir, buna misal olaraq taxılı göstərmək olar. Nəqliyyat logistikada Azərbaycanın ən böyük tərəfdaşı Rusiyadır. Azərbaycana gələn hər üç turistdən biri Rusiyanın payına düşür. Rusiya vətəndaşları Azərbaycanda daşınmaz əmlak alır", - iqtisadçı Elçin Rəşid deyib.
