“Milan”ın əzəmətli tarixində iz buraxmış isimlərdən biri də Deyan Saviçeviçdi.
"Football-plus.az" xəbər verir ki, o, 1992-98-ci illərdə “rossonyerlər”in heyətində üç ölkə çempionluğu və bir ÇL olmaqla 7 titul qazanıb. Onun 1994-də ÇL-in finalında Kroyffun “Barselona”sı ilə oyunda aşırma zərbəylə vurduğu qol turnirin unudulmazları arasındadı. Hazırda 58 yaşlı Saviçeviç Monteneqro Futbol Federasiyasının prezidenti vəzifəsini icra edir. O, bugünlərdə İtaliyanın “Qazetta dello Sport” nəşrinə həm keçmiş, həm də indiki dönəmlə bağlı müsahibə verib.
- Kapello müsahibələrinin birində sizi karyerası ərzində birlikdə çalışdığı ən güclü oyunçulardan biri adlandırıb. Bu fikrə münasibətiniz necədi?
- Onun kimi məşqçidən belə sözlər eşitmək xoşdu. Amma düzünü desəm, ilk vaxtlar onunla aramızda problemlər var idi. Həmin “Milan”da güclü oyunçu çox idi. Mən ora gələndə artıq uşaq deyildim. Bir il öncə “Srvena Zvezda” ilə Çempionlar Kubokunu qazanmışdım. “Milan”da yaxşı hücum oyunçuları var idi. Üç niderlandlıdan başqa Papen və Lentini də komandada idi. İlyarımı uyğunlaşmaya sərf etdim. Dil, yemək, şəhər, yeni liqa, yeni futbolçular... Üstəlik fiziki cəhətdən də problemlər yaşayırdım. Hətta bəzən Belqrada dönmək barədə də düşünürdüm.
- Amma Berluskoni sizin tərəfinizdə idi və onun Kapello ilə söhbətindən sonra həmı üçün sərfəli olan çıxış yolu tapıldı.
- Bəli, vəziyyət yaxşıya doğru dəyişməyə başladı. Kapello səbrli şəkildə potensialımı açmağımı gözləyirdi. Ona görə də indi əminliklə deyə bilərəm ki, o, karyeramdakı ən güclü məşqçidi.
- Berluskoni 1994-dəki finaldan öncə sizə nə dedi?
- Məni həqiqətən də sevirdi. Finaldan əvvəlki gecə zəng vuraraq “Deyan, mən iki ilə yaxındı səni hər kəsdən qorumağa çalışıram. Dahisənsə, bunu sübut elə” dedi.
- Siz də sübut edərək Kroyffun ulduzlarının darmadağın olunduğu qarşılaşmada unudulmaz bir qol vurduz. O qolu tez-tez xatırlayırsız?
- O anı və həmin gecəni unutmaq mümkün deyil. Özü də unutmayaq ki, biz Barezi və Kostakurtasız oynayırdıq. “Barselona” haqlı olaraq favorit sayılırdı. “Barsa”nın özündənrazı ulduzları bizi məhv edəcəklərini düşünürdülər. Amma 4 cavabsız qol vurduq. Futbolda favoritlər heç də həmişə qalib gəlmir. Bəlkə də karyeramın ən gözəl qolunu vurdum. Kapello sonradan o qolu necə vurduğumu soruşdu. Mən isə ona dedim ki, zərbəni vuranda artıq qol olacağını bilirdim. Sonradan o qol videokasetlərdə və DVD-lərdə yayıldı. Elə internetdə də sürətlə yayılaraq bir ara fenomen qolların sırasına düşdü. Amma mən “Srvena”nın heyətində də çoxlu baxımlı qol vurmuşdum. Həmin finalda dubl edən Massaro da əla oynamışdı. Onun qol duyumu mükəmməl idi.
- Həmişə Massaro ilə gözəl anlaşdığınızı demisiz...
- Bəli. Mən, ümumuyyətlə, qol vurmağı sevən futbolçularla yaxşı anlaşırdım.
- Bəs “Srvena” ilə qazandığınız ÇK xatirənizdə necə qalıb?
- 1991-də Bari şəhərindəki “San-Nikola” stadionunda “Marsel”i penaltilər seriyasında məğlub etdik. Ümumiyyətlə, Bari mənim üçün uğurlu şəhərlərdən biridi. Həm də Monteneqroya çox yaxın ərazidə yerləşir. Üstəlik bir neçə il sonra “Milan”ın heyətində yenə də həmin stadionda 5:3 qalib gəldiyimiz oyunda 4 qol vurmuşdum. Karyeramdakı yeganə pokeri məhz orda etmişəm.
- Sizin Massaro ilə duetinizdə olduğu kimi “Milan” fanatları yeni transfer olunan Feliş-Ximenes duetinin də sehirli alınacağına ümid edir. Onların arzusu reallığa çevrilə bilərmi?
- Əlbəttə. “Milan” əla və böyük klubdu. 7 dəfə ÇL-i qazanmaq elə-belə iş deyil. “Milan” böyük bir tarixdi. Şadam ki, mən də bu tarixin bir parçası olmuşam və dünyanın əın güclü klublarından birində çıxış etmişəm. İnanıram ki, yeni gələnlər də bu klubla fəxr edəcək.
- Ümumiyyətlə, “Milan”ın oyunlarını izləyirsiz?
- Bəli, izləyirəm. Amma əvvəlki illərdəki qədər diqqətlə yox. Çünki başqa işlərim də var. Monteneqroda futbolun inkişafına görə mən cavabdehlik daşıyıram. Boş vaxt tapan kimi ya “Milan”ın oyunlarını, ya da xaricdə çıxış edən monteneqrolu futbolçuların çıxışını izləyirəm. Məsələn, Maruşiç və Krstoviç kimi...
- “Milan”ın bu qış həyata keçirdiyi transferlər barədə nə düşünürsüz?
- Ən azı heyət əvvəlkindən güclü olub. Təəssüf ki, Bennaseri satdılar. Onu çox bəyənirdim. Sottil? Onun atası yaxşı futbolçu idi.
- Fanatlar nikbindi və onların fikrincə, yeni transferlər komandanı irəli aparacaq.
- “Milan” artıq bu mövsüm titul qazanıb. İndi isə bütün diqqəti İtaliya kubokuna və ÇL-ə vəsiqə qazanmağa yönəltmək lazımdı. Komanda bunu bacarmalıdı və bacaracaq.
- Feliş ilə Ximenes eyni anda start heyətində oynaya bilərmi?
- Fikrimcə, oynaya bilər. İstənilən halda komandanın başında Serjio Konseysao kimi mütəxəssis dayanıb. “Milan” onu gətirməklə düzgün addım atdı. Konseysao ilk növbədə Feliş üçün lazımi fiqurdu. Felişin böyük istedadı var. Sadəcə, bunu üzə çıxarmaq lazımdı. Onun topla necə hərəkət etdiyini, necə irəlilədiyini və hücumların qurulmasında necə iştirak etdiyini görmüşəm. “Milan”da oynayırsansa, fikrini toplamalı və var gücünü ortaya qoymalısan. Konseysao ona kollektivə uyğunlaşmağa yardım edəcək. Çünki ikisi də portuqaliyalıdı və çox tez dil tapacaqlar. Feliş Bura İngiltərədən gəlib. Mən İtaliyada oynadığım dönəmdə premyer-liqa A seriyası ilə müqayisədə gülməli çempionata bənzəyirdi. İngiltərə təmsilçiləri az qala 3-cü dərəcəli klublar sayılırdı. Amma indi vəziyyət fərqlidi. Onlar əla çempionat qurublar və bu baxımdan hamını üstələyirlər.
- Bəs Ximenes?
- Düzünü desəm, onu o qədər yaxşı tanımıram. Amma bilirəm ki, çox məhsuldar oyunçudu. Gəlin, İbrahimoviçin sözünə güvənək. O, Ximenesin güclü futbolçu olduğunu deyirsə, deməli, həqiqətən də belədi.
ƏLİ RAUFOĞLU hazırladı
- Ночной Режим
- Домашняя страница
- Статистика
- Источники
- Рейтинг
- Погода
- Валюта
