Əmək miqrantları üçün giriş rejiminin sərtləşdirilməsi Rusiyanın uzunmüddətli maraqlarına ziddir.
Demokratikmusavat.com xəbər verir ki, bunu Rusiya xarici işlər naziri Sergey Lavrov deyib.
“Mərkəzi Asiya ölkələrindən, ilk növbədə Cənubi Qafqazdan və digər keçmiş respublikalardan olan əmək miqrantlarına münasibətimizi sərtləşdirməyimiz uzunmüddətli maraqlarımıza kömək etməyəcək. Bəli, təbii ki, nizam-intizam qorunmalıdır. Miqrantların gəldiyi bir sıra coğrafi istiqamətlərdə bir çox qanun pozuntuları qeydə alınıb”, - Lavrov qeyd edib.
Lavrov əlavə edib ki, bununla bağlı həyata keçirilən tədbirlər əmək miqrasiyasına maneələr yaratmaq deyil, nəzarəti gücləndirmək məqsədi daşıyır.
O, Rusiyanın ən yaxın müttəfiqləri ilə münasibətlərdə süni maneələr yaratmadan bu cür tədbirlərin həyata keçirilməsinin mümkünlüyünə əmin olduğunu bildirib.
Lavrov əmindir ki, həll yolu tapılacaq və bu, Rusiyanın müttəfiqləri ilə münasibətlərdə heç bir maneə yaratmayacaq.
