PSJ-nin prezidenti Nasser Əl-Xələfi etiraf edib ki, 2013-cü ildə klubun üç il ərzində UEFA Çempionlar Liqasını qazanmalı olduğunu deməklə tələsik qərar verib.
Offsideplus.az "Bild" nəşrinə istinadən xəbər verir ki, klubun prezidenti açıqlamasında səhvini dilə gətirib:
"Səhv etdim və bunu açıq şəkildə qəbul edirəm. Amma biz səhvlərimizdən dərs alırıq. Əgər indi məndən soruşsanız ki, bizim əsas hədəfimiz Çempionlar Liqasını qazanmaqdırmı, cavabım 'xeyr' olacaq.
Amma əgər soruşsanız ki, biz hər oyunda mübarizə aparmaq istəyirikmi? Bəli. Hücum futbolu oynamaq istəyirikmi? Bəli. Azarkeşləri əyləndirmək istəyirikmi? Bəli. Bunu bacaracaq futbolçularımız varmı? Bəli.
Bizdə elə oyunçular var ki, bu mövsüm, gələn mövsüm və hətta səkkiz il sonra belə Çempionlar Liqasını qazana bilərlər. Biz gələcəyin böyük komandasını qurmaq üçün möhkəm baza yaratmışıq.
PSJ-nin yeni ulduzu komandanın özüdür. Klubumuzun fəlsəfəsini qısa müddət ərzində necə dəyişdiyimizə görə qürur duyuram. Komanda ruhu mənim üçün hər şeydən önəmlidir – komandanın daxilində, meydanda, ehtiyat oyunçular skamyasında, tibbi heyətdə, analitiklərdə və pərdə arxasında çalışan hər kəs arasında. Təbii ki, azarkeşlərimizi də unutmuruq".
