ABŞ prezidenti Donald Trampın administrasiyası Ukraynanı resurs sazişini qəbul etməkdən imtina edəcəyi təqdirdə rəhbərliyinin korrupsiya sxemlərinin ifşa ediləcəyi ilə hədələyib.
NOCOMMENT.az xəbər verir ki, bu barədə The Washington Post (WP) qəzetinin köşə yazarı David İqnatius mənbələrə istinadən yazıb.
“Təzyiq vasitəsi kimi amerikalıların məmurlar arasında iddia edilən korrupsiya hallarını ifşa etməklə hədələdikləri bildirilir. Mənə dedilər ki, Ağ Ev hətta Zelenskinin əsas siyasi rəqibi general Valeriy Zalujnı ilə də əlaqə saxlayıb ”, – materialın müəllifi qeyd edib.
İqnatius həmçinin vurğulayıb ki, bütün bunlar Trampın Ukraynanı sülh danışıqlarına məcbur etmək üçün daha böyük strategiyasının bir hissəsidir. Eyni zamanda, o qeyd edib ki, bu tapşırığı yerinə yetirmək olduqca çətindir və Kiyevin barışmazlığı səbəbindən ABŞ-ın vasitəçilik funksiyaları iflasa uğraya bilər.
Bundan əvvəl “Politico” jurnalı Trampın ətrafındakı insanların Zelenskinin bir sıra rəqibləri ilə gizli danışıqlar apardığını yazmışdı. Nəşrin məlumatına görə, müzakirələr Ukraynada növbədənkənar prezident seçkilərinin keçirilməsinin mümkünlüyü ilə bağlı olub. Səsvermənin keçirilməsi ideyasını açıq şəkildə inkar etmələrinə baxmayaraq, Vaşinqtonla güzəştə getməyə hazır olduqları bildirilir.
Yanvarın 20-də Rusiya prezidenti Vladimir Putin bəyan edib ki, Ukraynada münaqişənin həllində əsas məsələ onun səbəblərini aradan qaldırmaqdır. Rusiya lideri əmin olduğunu bildirib ki, hərbi əməliyyatların başa çatması qısamüddətli möhlət deyil, uzunmüddətli sülhə gətirib çıxarmalıdır.
