Çin hökuməti bu gün bəzi Kanada kənd təsərrüfatı mallarına qarşı cavab tarifləri elan edib.
Valyuta.Az xəbər verir ki, bu tariflər Kanadanın Çin istehsalı olan elektrik nəqliyyat vasitələri, polad və alüminium məhsullarına idxal rüsumları tətbiq etməsinə cavab olaraq tətbiq ediləcək.
Pekindən bildirilib ki, Kanada mənşəli raps yağı, yağlı yem və noxuda 100% tarif tətbiq olunacaq, su məhsulları və donuz ətinə isə 25% rüsum qoyulacaq.
Çinin Dövlət Şurasının Gömrük Tarif Komissiyasının açıqlamasına görə, bu tariflər martın 20-dən qüvvəyə minəcək.
Bu addım son aylarda ABŞ, Çin, Kanada və Meksika tərəfindən elan edilən bir sıra tarif qərarlarının fonunda, qlobal ticarət müharibəsinin qızışdığı bir vaxtda atılır.
Kanada keçən il oktyabrın 1-dən etibarən Çin istehsalı olan elektrik nəqliyyat vasitələrinə 100% idxal tarifi tətbiq edib. Bu qərar ABŞ və Avropa İttifaqının ədalətsiz rəqabətlə bağlı narahatlıqlarına uyğun olaraq qəbul edilib.
Bundan əlavə, Ottava oktyabrın 15-dən etibarən Çin mənşəli polad və alüminium məhsullarına 25% rüsum tətbiq edib.
"Kanadanın birtərəfli qaydada tarif tətbiq etməsi obyektiv faktları və Ümumdünya Ticarət Təşkilatının qaydalarını nəzərə almır. Bu, tipik ticarət proteksionizmi təcrübəsidir, Çinə qarşı ayrı-seçkilik xarakteri daşıyan tədbirdir, Çinin qanuni hüquq və maraqlarına ciddi şəkildə zərər vurur və Çin-Kanada iqtisadi və ticarət əlaqələrini zəiflədir", – deyə Çinin gömrük orqanlarının bu gün yaydığı bəyanatda bildirilib.
Rəhim
