BAKI, TurkicWorld
Alimlər Günəşə bənzəyən bir ulduzun ətrafında, cəmi 20 işıq ili uzaqlıqda fırlanan və potensial yaşayış üçün əlverişli olan yeni bir super-Yer planetini kəşf ediblər.
TurkicWorld AzerVoice-a istinadən xəbər verir ki, HD 20794 d adlı bu planet öz ulduzunun ətrafında 647 gündə bir dövr edir və maye suyun mövcud ola biləcəyi yaşayış zonasında yerləşir.
Bu kəşf Kanar Adaları Astrofizika İnstitutu (IAC) və La Laquna Universiteti (ULL) alimlərinin apardığı uzunmüddətli araşdırmalar nəticəsində təsdiqlənib. Yeni nəsil teleskoplar sayəsində bu planetin atmosferinin tədqiqi mümkün ola bilər ki, bu da Yerə bənzər planetlərin öyrənilməsi üçün mühüm imkan yaradır.
HD 20794 d Yerdən altı dəfə böyükdür və öz ulduzu ətrafında elliptik orbitlə hərəkət edir.
Orbit müddəti 647 gün təşkil edir, bu isə Marsın Günəş ətrafında dövr etməsindən 40 gün qısadır.
Onun ulduzdan məsafəsi mütəmadi dəyişir, bu da planetin yaşayış zonasının xarici və daxili sərhədləri arasında hərəkət etməsinə səbəb olur.
Planet sistemə olan yaxınlığı və ulduzun xüsusiyyətləri səbəbindən ELT (Avropa Ekstremal Böyük Teleskopu), NASA və ESA-nın gələcək kosmik missiyaları üçün ideal tədqiqat obyekti hesab olunur. Astronomlar bu planetin atmosferini incələyərək, həyatı dəstəkləyən şərtlərin olub-olmadığını araşdırmaq niyyətindədirlər.
Qeyd edək ki, HD 20794 ulduzu Günəşdən bir qədər kiçikdir və bu sistemdə daha əvvəl də iki super-Yer kəşf edilmişdi. Yeni tapılan HD 20794 d isə həmin sistemdə aşkarlanan üçüncü super-Yer oldu.
